İnfrastruktur

Ana səhifə

İnfrastruktur

GTZ ilə Azərbaycan Fövqəladə Hallar Nazirliyi arasında anlaşma memorandumu imzalanıb

14 noyabr 2008 14:14 (UTC +04:00)

Bakı. Nicat Mustafayev – APA-Economics. Almaniya Texniki Əməkdaşlıq Cəmiyyəti (GTZ) ilə Azərbaycan Fövqəladə Hallar Nazirliyi (FHN) arasında anlaşma memorandumu imzalanıb.
GTZ-dən «APA-Economics»ə verilən məlumata görə, 2007-ci ildə GTZ ilə FHN arasında Azərbaycanda təbii fəlakətlərin ictimai yönümlü erkən xəbərdarlığı və qarşısının alınması sisteminin yaradılması sahəsində ikitərəfli əməkdaşlığın təməli qoyulub və bu məqsədlə tərəflər arasında müvafiq anlaşma memorandumu imzalanıb. Memorandumda hər iki tərəfin nəzərdə tutulan layihələrin həyata keçirilməsində vəzifələri əksini tapıb. Sənəd eyni zamanda Almaniya və Azərbaycanın müvafiq qurumları arasında bu istiqamətdə əlaqələrinin möhkəmlənməsi və genişləndirilməsinə zəmin yaradır.
«Hər il müxtəlif təbii fəlakətlər Azərbaycanın iqtisadiyyatına və ətraf mühitinə ciddi ziyan vurur. Bu mənfi təsir ölkənin Şəki-Zaqatala regionunda xüsusilə özünü büruzə verir. Belə ki, əsasən mövsümi yağışlar nəticəsində baş verən sellər, daş-palçıq axımları, sürüşmələr və daş uçqunları regionun təsərrüfat obyektlərinə və iqtisadiyyatına ziyan vuraraq ərazilərin dayanıqlığını təhlükə altına alır. Bölgənin çətin keçidli dağlıq landşaftı, dar və dərin yüksək dağ çaylarının vadiləri burada təbii fəlakətlərin baş vermə riskini və miqyasını və yerli əhalinin normal yaşayışı üçün təhlükə potensialını artırır», - deyə GTZ-dən bildirilib.
Bunu nəzərə alaraq, FHN memorandumla nəzərdə tutulan layihənin icrası üçün məhz Böyük Qafqazın cənub yamacında yerləşən Balakən, Şəki və Gəbələ rayonlarını seçib. Layihənin 2008-2009-cu illər ərzində yerinə yetirilməsi nəzərdə tutulub. Layihənin əsas məqsədi təbii fəlakətlərin yarada biləcək fövqəladə halların qabaqcadan xəbərdar edilməsi, onlara hazırlıq və çevik reaksiya verilməsi sahəsində yerli əhalinin potensialının artırılmasından ibarətdir. Layihə əhalinin bütün təbəqələri üçün erkən xəbərdarlıq sisteminin üstünlüklərindən yararlanmaq imkanı yaradacaq.
Layihə geniş ictimaiyyətlə iş, bölgədə mövcud olan fəlakət risklərinin qiymətləndirilməsi və inventarlaşdırılması, təhlükə haqqında erkən və dəqiq məlumatın əldə olunması və yerlərdə fövqəladə hallara hazırlığın təmin olunması üzrə müasir texnologiyaların tətbiqi ilə həyata keçiriləcək.