İnfrastruktur

Ana səhifə

İnfrastruktur

Arif Qaraşov: «Dünya maliyyə böhranı nəticəsində Azərbaycanda yalnız xarici investisiyalı iri layihələrdə durğunluq müşahidə olunur»

28 noyabr 2008 10:45 (UTC +04:00)

Bakı. Nicat Mustafayev – APA-Economics. Bakıda Azərbaycan Daşınmaz Əmlakın Dövlət Reyestri Xidmətinin (DƏDRX) IV kollegiya iclası keçirilir.
«APA-Economics»in məlumatına görə, tədbirin açılışında çıxış edən Xidmətin rəisi Arif Qaraşov qeyd edib ki, bu ilin noyabrın 27-də dövlət başçısı tərəfindən «Azərbaycan Respublikasında ünvan reyestrinin aparılması və daşınmaz əmlak obyektlərinə ünvan verilməsi Qaydaları»nı təsdiqləyib və həmin sənəd artıq yaxın gələcəkdə öz müsbət effektini göstərəcək.
A.Qaraşov həmçinin bildirib ki, cari ilin yanvar-sentyabr ayları ərzində DƏDRX-in ərazi idarələrində 93 328 daşınmaz əmlak üzərində hüquqlar qeydiyyata alınıb: «Hesabat dövrü ərzində 14 551 ipoteka müqaviləsi dövlət qeydiyyatına alınıb. Ümumiyyətlə, xidmət tərəfindən cari ilin ilk 9 ayı ərzində həyata keçirilən təhlil 10% artıb».
Xidmət rəisi əlavə edib ki, dünyada müşahidə olunan maliyyə böhranı nəticəsində Azərbaycanda heç bir durğunluq yoxdur: «Durğunluq yalnız xarici investisiyalar hesabına ölkədə icra olunan iri layihələrdə müşahidə olunur».
A.Qaraşovun sözlərinə görə, cari ilin III rübü ərzində ipoteka müqavilələrinin dövlət qeydiyyatından keçməsi 22% azalıb. Belə ki, əgər ötən ilin III rübü ərzində 5 680 ipoteka müqaviləsi qeydiyyata alınmışdırsa, bu ilin analoji dövründə bu rəqəm 4 645 olub. Daşınmaz əmlakın texniki pasportunun tərtibinə gəldikdə isə, A.Qaraşov qeyd edib ki, ötən ilin III rübündə 52 394 texniki pasport tərtib edilib. Bu ilin eyni dövründə isə bu rəqəm 41% artaraq 74 080-ə çatıb.
Daşınmaz əmlakın alqı-satqı müqavilələrinin qeydiyyata alınmasına gəldikdə isə, A.Qaraşov bildirib ki, ötən ilin III rübündə 85 775 müqavilə, cari ilin analoji dövründə isə 93 min qeydiyyata alınıb.
Bundan başqa DƏDRX rəisi qeyd edib ki, Xidmətin 2,5 illik fəaliyyəti ərzində 5 ərazi idarəsi və 2 rayon şöbəsi üçün inzibati bina istifadəyə verilib. Daha 5 ərazi və 1 rayon şöbəsində tamamlanma işləri gedir ki, cari ilin sonunadək həmin binalar istifadəyə veriləcək: «Xidmətin rəsmi fəaliyyəti dövründə 3,63 mln. manat dəyərində tikinti işləri aparılıb. Yaxın gələcəkdə Ucar, Zaqatala, Tovuz və digər bölgələrdə də ərazi idarələrinin inzibati binaları istifadəyə veriləcək. Növbəti il ərzində ölkənin digər bölgələrində də inzibati binalar tikiləcək».
Tədbir çərçivəsində A.Qaraşov həmçinin Azərbaycanda Dünya Bankı ilə birgə icra olunan «Daşınmaz əmlakın qeydiyyatı Layihəsi» haqqında danışıb və qeyd edib ki, layihə çərçivəsində ölkədə özbaşına və qeyri-qanuni tikililər üzrə hazırki vəziyyət araşdırılacaq.
Xidmət rəisi onu da bildirib ki, hazırda Azərbaycanda mülkiyyət hüquqlarının qeydiyyatı tarixinin öyrənilməsi istiqamətində araşdırmalar aparılır və yaxın gələcəkdə bu mövzuda konfrans keçiriləcək.
Qeyd edək ki, kollegiya iclasına Xidmətin beynəlxalq təşkilatlarla əməkdaşlıq əlaqələri, «Daşınmaz əmlakın qeydiyyatı Layihəsi»nin icra vəziyyəti, DƏDRX Aparatında və ərazi orqanlarında vətəndaş müraciətlərinə baxılması və mövcud nöqsanların aradan qaldırılması tədbirləri və bir sıra digər məsələlər müzakirəyə çıxarılıb.