İnfrastruktur

Ana səhifə

İnfrastruktur

Azərbaycanın avtomobil bazarında ucuzlaşma davam edir

16 dekabr 2008 13:53 (UTC +04:00)

Noyabrda təklifdə qeydə alınan göstərici il ərzində ən yüksək həddə çatıb. Təklifin artmasına səbəb bir neçə ay davam edən passivlikdən sonra bazara yeni avtomobillərin daxil olması, dinamikanın müşahidə olunması, ilin başa çatması ilə əlaqədar olaraq avtomobil ticarəti ilə məşğul olan sahibkarlarda olan avtomobilləri ilin sonuna qədər realizə etmək istəyi və tranzit yollarda baş verən problemlərin aradan qalxmasıdır. Noyabrda təklifin artmasına baxmayaraq, tələbdə cəmi 1,6%-lik artım müşahidə olunub. Ay ərzində satış mərkəzlərinə müraciət edənlərin sayında da artım qeydə alınıb ki, bu da bağlanan əqdlərin dinamikasının 1,3% artmasına təsir edib. Ay ərzində bazarda orta qiymət 6,4% azalaraq 19 650 ABŞ dolları səviyyəsinə düşüb.
Noyabr ayında avtomobillərin ekspozisiya müddəti daha 4 gün artaraq 70 günə çatıb. Buna müvafiq olaraq, risk dərəcəsi artıb və əmlakın bu növü üzrə likvidlik dərəcəsi nisbətən düşüb. Oktyabr ayında təkrar avtomobil bazarında araşdırma predmeti olan 6500-dən artıq avtomobilin cəmi 41%-ə qədəri bazara məhz oktyabrda təklif olunub. Qalan 59%-i isə əvvəlki aylardan qalan avtomobillərdir.
Bazardakı yerdəyişmələr təkrar bazarda proqnozlaşdırılan qiymət artımının qarşısını alıb və dünyada baş verən maliyyə böhranının avtomobil istehsalçılarına mənfi təsiri noyabrda qiymətlərin bir qədər də ucuzlaşmasına təsir göstərib. Qiymət azalması daha çox ilkin bazarda qeydə alınıb. Bazar üzrə orta qiymət azalması 10%-ə çatıb. Təkrar bazarda isə passivliyin hökm sürməsinə və təklifin tələbi sürətlə üstələməsinə baxmayaraq, qiymət azalması cəmi 3,8% təşkil edib.
İki ildən artıqdır ki, təkrar bazarda liderliyi böyük fərqlə saxlayan «Mercedes-Benz»in təklif üzrə payında 8 aylıq geriləmənin (12,8%) ardından oktyabrda qeydə alınan (1,5%) artım noyabrda yenidən azalma ilə əvəz olunub (1,1%).
Ötən ay Rusiya istehsallı avtomobillərin təkrar bazardakı təklif üzrə payı 4,6%-dən 7,9%-ə qədər artıb. Ümumilikdə, bu 9 markanın təklif üzrə payı 83,5% təşkil edib. Qalan 16,5% isə 20-dən artıq şirkətin istehsalı olan 85-ə yaxın avtomarka arasında bölünür.
Təkrar bazara təqdim olunan avtomobillərin illər üzrə bölgüsündə ciddi dəyişiklik baş verməyib. Artıq 1998-1999-cu illərin istehsalı olan avtomobillər bazarda 1996-1997-ci illərin markalarını sıxışdırmağa başlayıb. Bununla yanaşı, ili yeni olan avtomobillərə olan marağın artması təklifdə də ili yeni olan avtomobillərin artımı ilə müşahidə olunur.