İnfrastruktur

Ana səhifə

İnfrastruktur

Azərbaycan Dövlət Neft Şirkəti Gürcüstanda 6 dəmiryol xəttinin bərpasını başa çatdırıb

19 dekabr 2008 13:01 (UTC +04:00)

Bakı. Rəşad Süleymanov – APA-Economics. Azərbaycan Respublikası Dövlət Neft Şirkətinin (ARDNŞ) Gürcüstanda aldığı Qara dəniz Terminalı (Kulevi) Qərbi Gürcüstanın Samtrediya şəhərində yerləşən 6 dəmiryol xəttinin bərpasını başa çatdırıb. Bu barədə «APA-Economics»ə terminaldan məlumat verilib.
Avqustun əvvəlində başlayan təmir işləri artıq başa çatıb. Ümumilikdə, təmir olunan dəmir yol xətlərinin uzunluğu 5 min metrə yaxındır. Bununla, Kulevi neft terminalının götürdüyü öhdəliklərin birinci mərhələsi başa çatıb. Bir həftə ərzində terminal götürdüyü öhdəliyin ikinci mərhələsinə uyğun olaraq Senakidə kərpic zavod adlanan stansiyaya gedən 870 metrlik və Xobi rayonunda uzunluğu 875 metr olan dəmir yol xətlərinin təmir-bərpa işlərinə başlayacaq. İnşa olunan 6 dəmiryol xətti vaqonların stansiyalarda qəbul edilib yola salınması prosesini daha da asanlaşdıracaq.
Terminalın vəsaiti hesabına həmçinin Poti şəhəri yaxınlığında yerləşən Caladidi stansiyasında əlavə 2 xəttin tikilməsi və Caladididən Kolxeti stansiyasına qədər olan məsafədə yeni xəttin çəkilməsi üçün lazımi geoloji işlər aparılır.
Qeyd edək ki, bu günədək Kulevi neft terminalı Gürcüstanın dəmir yolu infrastrukturuna 3 mln. ABŞ dollarınadək vəsait yatırıb. Bundan başqa, terminal gələn il idxal olunan neft məhsulunun həcmini 8-10 mln. tona qədər çatdırmağı planlaşdırır. Kulevi terminalı bu yaxınlarda «Moodys International» şirkətindən keyfiyyət sertifikatı alıb.
ARDNŞ yarımçıq Kulevi terminalını 2006-cı ilin sonunda alıb. Şirkət terminala 300 mln. dollardan artıq sərmayə yatırıb. Cari ilin may ayında istifadəyə verilən terminalın illik yük buraxma gücü 4 mln. tondur.