İnfrastruktur

Ana səhifə

İnfrastruktur

«Bakcell» şirkəti EDGE texnologiyasına keçir

24 fevral 2009 07:16 (UTC +04:00)

Bakı. Aynur Vəliyeva – APA-Economics. Azərbaycanın ilk mobil rabitə operatoru olan «Bakcell» şirkəti yeni mobil məlumat ötürmə xidmətlərinə artan tələbatı nəzərə alaraq EDGE texnologiyasına keçid ilə bağlı işlərə başlayıb.
Şirkətin Bakıdakı baş ofisindən «APA-Economics»ə verilən məlumata əsasən, yeni texnologiyanı «Nokia Siemens Networks» şirkəti tətbiq edəcək və nəticədə, «Bakcell» şəbəkənin əhatəsinin genişlənməsi və xidmətlərin keyfiyyətinin artırılması ilə bütün ölkə üzrə istifadəçilərin artan tələbatını təmin edəcək.
İki şirkət arasında bağlanılan müqaviləyə əsasən, «Nokia» şirkəti «Bakcell»in şəbəkəsində öz «Flexi EDGE» Baza Stansiyaları Patformasını (Flexi EDGE Base Station Platform) tətbiq etməklə, radio və baza şəbəkəsinin tam genişləndirilməsini təmin edəcək. «Flexi» modul konsepsiyası «Bakcell»ə baza stansiyalarının konfiqurasiyasında yüngül dəyişikliklər etmək və enerji sərfinə qənaət edilməsi sayəsində əməliyyat məsrəflərini azaltmaq imkanı verəcək.
«Bakcell»in baş direktoru İneke Botter qeyd edib ki, yeni texnologiya ətraf mühit üçün əlverişlidir və abunəçilərə video, İnternet və audio xidmətləri özündə birləşdirən müxtəlif yeni mobil xidmətlərin göstərilməsinin çevikliyini təmin etmək imkanı verir. Bu, hətta ADSL ilə müqayisə olunacaq sürətlə səs və məlumat ötürmə xidmətlərindən eyni zamanda istifadə etmək imkanı verəcək.
«Bakcell»in seçdiyi pilot «Flexi» öz baza stansiyasının ölçülərinə görə olduqca kiçikdir, modul tiplidir və asan quraşdırılır, bu isə şəbəkənin daha operativ genişləndirilməsinə, həmçinin digər operatorlarla imkanların asanlıqla paylaşmasına imkan verir. Enerji effektivliyinə görə dünyada lider olan «Flexi» baza stansiyası operatorlara şəbəkə qovşağının enerji sərfini 70% qənaət azaldır. Bu, 3G, WiMAX və LTE kimi digər qabaqcıl mobil radio texnologiyaları ilə asanlıqla uyğunlaşa bilən, gələcəyin hazır platformasıdır.
«Bakcell»in bu avadanlıqla təchizatı bu ilin mart ayında başlanacaq və şəbəkənin genişləndirilməsi 2009-cu ilin sonunadək tam başa çatdırılacaq.
Xatırladaq ki, 1994-cü ildən fəaliyyət göstərən «Bakcell» şirkəti hazırda 1,2 mln. abunəçi bazasına malikdir, ölkə əhalisinin 88%-dən artıq hissəsini və ərazisinin isə 80%-ni əhatə edir.