İnfrastruktur

Ana səhifə

İnfrastruktur

Monitorinq: Azərbaycanda İnternet xidmətləri qonşu ölkələrlə müqayisədə 10 dəfə bahadır

24 fevral 2009 12:10 (UTC +04:00)

Bakı. Aynur Vəliyeva – APA-Economics. Azərbaycanın İnternet Forumu «İnternet xidmətlərinin qiymətləri və onlara uyğun keyfiyyət» mövzusunda keçirdiyi monitorinqin nəticələri ilə bağlı bu gün mətbuat konfransı keçirib.
«APA-Economics»in məlumatına görə, tədbirdə iştirak edən İnternet Forumunun rəhbəri Osman Qündüz bildirib ki, monitorinq Rabitə və İnformasiya Texnologiyaları Nazirliyinin təşəbbüsü ilə İnternet tariflərinin son azaldığı dövrdən - fevralın 1-dən keçirilib. Nəticədə müəyyənləşib ki, endirimin bir sıra müsbət tərəfləri ilə yanaşı, mənfi tərəfləri də olub. Müsbət dəyişikliklər sırasında geridə qalmış Dial-up xidməti istifadəçilərinin (İnternet istifadəçilərinin 95%-i) bir hissəsinin artıq genişzolaqlı İnternetə keçidi və bunun nəticəsində bir sıra provayderin artıq çoxdan istifadə etdiyi texniki bazanın modernləşdirilməsinə səy göstərməsi olub. Lakin tariflərin endirilməsinə baxmayaraq, İnternetə qoşulmanın real sürəti heç də göstərilən sürətə uyğun gəlmir. Araşdırmalar nəticəsində məlum olub ki, real sürət Bakı şəhəri üzrə 50-70%, şəhərətrafı rayonlar və Sumqayıt üzrə hətta 90%-dək aşağıdır. Bu da provayderlərin daha çox qazanc əldə etmək məqsədi ilə məsələn, 1 Mbit/s kanalının istifadəçiləri arasında tələb olunan bölgüdən 2 dəfə artıq istismarından irəli gəlir. Bundan başqa, bəzi hallarda provayderlərin təqdim etdiyi sürət ATS-lərin xətt imkanlarının məhdudluğundan, yəni simlərin standarta uyğun olaraq 0.7 qalınlığında deyil, 0.3 qalınlığında olmasından irəli gəlir. Beləliklə, istər provayderlərin, istərsə də ATS-lərin infrastrukturu böyük həcmdə yüksək sürətli İnternet xidmətlərinin göstərilməsi üçün texniki tələblərə cavab vermir.
Bundan başqa, 64-128 Kbit/s sürətlə göstərilən xidmətlər, hansı ki fərdi istifadəçilərin və kiçik şirkətlərin tələblərinə uyğun gəlir, aradan qaldırılıb. O.Gündüzün sözlərinə görə, bunun əsl səbəbi bu xidmətlərin artıq İnternet provayderləri üçün rentabelli olmaması ilə bağlıdır. Provayderlərə böyük həcmli trafikin satılması daha sərfəlidir, nəinki mövcud olan aşağı sürətin qiymətini endirmək.
Tədbirdə iştirak edən Azad İstehlakçılar Birliyinin sədri Eyyub Hüseynov bununla bağlı bildirib ki, İnternet tariflərinin sonuncu endirimindən uduzan yenə də istehlakçılar olub və ən çox istehlakçı şikayətləri «Bakinternet» Milli Provayderin istifadəçiləri tərəfindən daxil olub.
Bundan başqa, tariflərin endirilməsinə baxmayaraq, Azərbaycanda İnternet xidmətləri hələ də qonşu ölkələrdə olan qiymətlərdən 8-10 dəfə bahadır. Məsələn, 1 Mbit/s sürətlə İnternetə qoşulma imkanının qiyməti qonşu ölkələrdə (Rusiya, Gürcüstan, Türkiyə) 15-35 manat olduğu halda, Azərbaycanda bu, 130-150 manatdır, Ukrayna, İngiltərə, İsveçdə isə artıq bu sürətlə xidmət göstərilmir. Sadalanan ölkələrdə İnternetə qoşulmanın minimal həddi 5-6 Mbit/s-dir və onun qiyməti 25-30 manatdır, qonşu ölkələrdə 20-45 manatdır, Azərbaycanda isə 2 800 manat təşkil edir.
Bununla bağlı, İnternet Forumu tariflərin endirilməsi məsələsini diqqətdə saxlanılması, qiymətlərin qonşu ölkələrlə eyni vəziyyətə gətirilməsi, yeni İnternet texnologiyalarının (WiMAX və kabel İnternet xidmətləri) tətbiqi istiqamətində addımların atılmasının vacibliyini qeyd edib.