İnfrastruktur

Ana səhifə

İnfrastruktur

Azərbaycanda növbəti Milli İnternet Mükafatı müsabiqəsinə start verilib

25 fevral 2009 13:00 (UTC +04:00)

Bakı. Aynur Vəliyeva – APA-Economics. Azərbaycan Rabitə və İnformasiya Texnologiyaları Nazirliyində «NETTY-2009» Milli İnternet Mükafatı müsabiqəsinin başlaması ilə bağlı mətbuat konfransı keçirilib. «NETTY-2009» Azərbaycan Milli İnternet Mükafatının keçirilmə şərtlərinə uyğun olaraq, iştirakçıların və virtual jüri üzvlərinin qeydiyyatı bu ilin fevralın 25-dən aprelin 28-dək davam edəcək.
«APA-Economics»in məlumatına görə, «NETTY-2009» təşkilat komitəsinin sədri Ruslan Novruzovun verdiyi məlumata əsasən, bu il müsabiqədə iştirak edən saytların sayının 2 dəfə artacağı və yeni saytların təqdim olunacağı gözlənilir. Müsabiqənin iştirakçısı və ya virtual jürinin üzvü müsabiqənin qaydaları ilə ziddiyyət yaratmayan və Təşkilat Komitəsi tərəfindən bəyənilən www.netty.az saytında qeydiyyatdan keçmiş hər bir şəxs ola bilər.
Aprelin 28-dən mayın 7-dək virtual jürinin səsverməsi keçiriləcək. Bu müddət ərzində iştirak etmək üçün tələbnamələrin (ərizələrin) və virtual jürinin yeni üzvlərinin qəbulu dayandırılır.
Qabaqcadan qeydiyyatdan keçmiş virtual jürinin üzvləri «NETTY-2009»-un nominantlarını səsvermə vasitəsilə müəyyən edirlər. Jürinin hər bir üzvü Mükafat boyunca bir səs hüququna malikdir və səsi qeydə alınması üçün hər bir nominasiyada səs verməyə borcludur. Hər təqdim edilmiş kateqoriyada üç nominant müəyyən edilir.
Qeyd edək ki, bu il keçiriləcək müsabiqənin nominasiyalarına «Azərbaycanda uşaq ili - 2009» şüarı ilə «Ən yaxşı uşaq saytı» nominasiyası və «2009-cu il – Bakı İslam Mədəniyyətinin Paytaxtı» proqramı çərçivəsində «Bakı haqqında ən yaxşı sayt» nominasiyası əlavə ediləcək. Əlavə nominasiyaların siyahısında 2008-ci ildən mövcud olan müsabiqədən kənar «Ən yaxşı dizayn» nominasiyası dəyişdirilmədən saxlanılıb.
Bundan əlavə, NETTY-nin Akademiyası bu ildən başlayaraq hər il yeni – «İlin İT-hadisəsi» nominasiyasında Azərbaycan informasiya texnologiyaları sahəsində ən yaxşı layihənin adını açıqlayacaq. Bu nominasiyada mükafata namizəd Azərbaycanda və onun xaricində informasiya texnologiyalarının inkişafına köməklik göstərən layihələrin müəllifləri ola bilərlər.
Mayın 8-də virtual jürinin seçiminə əsaslanaraq milli informasiya texnologiyaları sahəsində fəaliyyət göstərən görkəmli xadimlərdən ibarət «NETTY-2009» Akademiyasının səsverməsi başlayır. Akademiya qapalı səsvermə vasitəsilə nominantların ümumi sayından hər nominasiyadan bir qalibi seçərək «NETTY-2009» finalçılarını müəyyən edəcək.
Qeyd olunan müddət ərzində, həmçinin müsabiqədən kənar fəxri nominasiyalar üzrə akademiklərin səsverməsi keçirilir. «NETTY-2009»-un qalibləri mayın 17-də təntənəli mərasimdə rəsmi elan ediləcək. Tədbirin gedişində Akademiyanın qərarı ilə müsabiqədən kənar nominasiyalar üzrə qaliblər də elan olunacaq.
Xatırladaq ki, «NETTY-2009» Azərbaycan Milli İnternet Mükafatı – Ümumdünya Şəbəkəsinin milli seqmentinin və ümumiyyətlə İT-bazarının inkişafı üçün yaradılmış informasiya texnologiyaları sahəsində Azərbaycanın birinci peşəkar mükafatıdır. NETTY mükafatı, başqa oxşar tədbirlərdən fərqli olaraq həm Azərbaycanda, həm də ümumiyyətlə regionda müntəzəm həyata keçirilən nadir və yeganə tədbirdir. Bu, artıq beşinci analoji tədbirdir.