İnfrastruktur

İnfrastruktur

NATO Qafqaz və Mərkəzi Asiya dövlətlərini əhatə edən fiber-optik şəbəkə quracaq

13 aprel 2009 13:46 (UTC +04:00)

Bakı. Rəşad Süleymanov – APA-Economics. NATO «Virtual İpək Yolu» layihəsinin davamı olaraq, Qafqaz və Mərkəzi Asiya dövlətlərini əhatə edən fiber-optik şəbəkənin qurulması və İnternetə çıxış imkanlarının artırılmasını nəzərdə tutan yeni layihə həyata keçirməyi planlaşdırır. Bu barədə «APA-Economics»ə NATO baş katibinin ictimai diplomatiya üzrə köməkçisi Jan Fransis Büro (Jean-François Bureau) məlumat verib.
J.Büronun sözlərinə görə, bu proqram Avropa İttifaqının dəstəyi ilə reallaşdırılacaq.
«Bu gün NATO-nun peyklərinin gücü artırılıb. İndi fiber-optik şəbəkəni inkişaf etdirməklə İnternetin sürətinin daha da artmasına nail olmağa çalışırıq», - deyə NATO rəsmisi bildirib.
J.Büro «Virtual İpək Yolu» layihəsində tələb edilən nəticəyə nail olunduğunu bildirib. Layihə çərçivəsində Qafqaz və Mərkəzi Asiya dövlətləri ilə yanaşı Əfqanıstanın da elm və təhsil müəssisələrinin sürətli İnternetə qoşulması təmin olunub. Hazırda Əfqanıstanın 6 universitetinin də bu layihəyə qoşulması istiqamətində iş aparılır.
Qeyd edək ki, NATO-nun Elm Proqramı tərəfindən həyata keçirilən «Virtual İpək Yolu» layihəsi Azərbaycan, Gürcüstan, Ermənistan, Qazaxıstan, Tacikistan, Özbəkistan, Qırğızıstan, Türkmənistan və Əfqanıstanı əhatə edir. Layihənin məqsədi peyk texnologiyaları vasitəsilə Mərkəzi Asiya və Cənubi Qafqaz ölkələrinin Milli Elmi-Tədqiqat və Təhsil Şəbəkələrinin Avropanın yüksək sürətli İnternet dayaq şəbəkəsinə qoşulmasını təmin etməkdir. Layihə həmçinin bu ölkələrin elmi-tədqiqat və təhsil müəssisələri arasında informasiya mübadiləsinin genişləndirilməsi məqsədi daşıyır. Bunun üçün layihədə iştirak edən ölkələrin hər biri VSAT-terminallarından ibarət avadanlıqla, peyk antenası və şəbəkə avadanlığı ilə təchiz edilərək, EUROASİASAT süni peyk stansiyası vasitəsilə Qərbi Avropanın magistral İnternet şəbəkəsinə yüksək sürətli çıxış imkanı əldə edib. Azərbaycanda bu layihə Azərbaycan Elmi-Tədqiqat və Təhsil Şəbəkələri Assosiasiyası (AzRENA) tərəfindən həyata keçirilir.