İnfrastruktur

Ana səhifə

İnfrastruktur

Azərbaycan Daşınmaz Əmlakın Dövlət Reyestri Xidmətinin mərkəzi aparatında hüquq mərkəzi açılıb

21 aprel 2009 10:57 (UTC +04:00)

Bakı. Rəşad Süleymanov – APA-Economics. Bu gün Dünya Bankının dəstəyi ilə Azərbaycan Daşınmaz Əmlakın Dövlət Reyestri Xidmətinin (DƏDRX) mərkəzi aparatında hüquq mərkəzi və video-konfrans otağı istifadəyə verilib. «APA-Economics»in məlumatına görə, DƏDRX rəisi Arif Qaraşov bildirib ki, mərkəz xidmətlə notariat orqanları arasında əlaqələrin müasir tələblərə uyğun qurulmasına dair təkliflər hazırlayacaq, həmçinin «Daşınmaz əmlakın qeydiyyatı Layihəsi» üzrə hüquq xidmətlərini həyata keçirəcək.
Dünya Bankının layihə koordinatoru Qeyvin Adlinqton isə qeyd edib ki, Azərbaycan hökuməti son illər daşınmaz əmlakın qeydiyyatı sahəsində bir sıra tədbir həyata keçirib. Dünya Bankı ilə birgə icra olunan «Daşınmaz əmlakın qeydiyyatı Layihəsi» isə bu tədbirlərdən miqyasına görə ən böyüklərindəndir.
«Daşınmaz əmlakın qeydiyyatı Layihəsi»nin icrası Azərbaycanda mülkiyyətin bir neçə formada qeydiyyata alınmasına imkan verəcək. Məlumat bazası yaradılacaq ki, bundan da həm müvafiq dövlət qurumları, həm də özəl sektor istifadə edəcək», - deyə A.Qaraşov vurğulayıb.
DƏDRX rəisi qeyd edib ki, artıq layihə çərçivəsində ölkə ərazisinin 40%-nin aeroortofoto çəkilişi aparılıb və hazırda məlumatlar emal olunur. Bir neçə regionun ortofoto xəritələri isə tam hazırdır.
Layihə çərçivəsində Azərbaycan üzrə bütün daşınmaz əmlakın ümumi metodologiya əsasında qiymətləndirilməsi həyata keçiriləcək. Beynəlxalq ekspertlər tərəfindən qiymətləndirmə metodologiyası işlənib və təsdiq üçün hökumətə təqdim olunub.
A.Qaraşovun sözlərinə görə, layihə çərçivəsində qeyri-qanuni tikililərin də monitorinqi aparılır. Monitorinqlərin nəticələri əsasında qanunsuz tikililərin müqəddəratı həll olunacaq.