İnfrastruktur

Ana səhifə

İnfrastruktur

Avropa İttifaqı ölkələri rouminqdə SMS və zənglərin qiymətini azaldır

23 aprel 2009 12:52 (UTC +04:00)

Bakı. Aynur Vəliyeva - APA-Economics. Avropa Parlamenti rouminq şəbəkəsində SMS-lərin və zənglərin qiymətlərini məhdudlaşdırıb. «APA-Economics»in məlumatına görə, qiymətlərin məhdudlaşdırılması ilə bağlı qərar Avropa Parlamentinin Strasburqda keçirilən iclasında qəbul edilib.
Belə ki, artıq bu il iyul ayının 1-dən etibarən Avropa İttifaqı ərazisində rouminqdə çıxış zənglərinin 1 dəqiqəsinin maksimal qiyməti 0,43 avro, daxil olan zənglərin 1 dəqiqəsinin maksimal qiyməti isə 0,19 avro təşkil edəcək. Gələn ilin iyulun 1-dən etibarən isə rouminqdə çıxış zənglərin 1 dəqiqəsinin maksimal qiyməti 0,39 avro, daxil olan zənglərin - 0,15 avro, 2011-ci ilin iyulun 1-dən çıxış zənglərin 1 dəqiqəsinin maksimal qiyməti 0,35 avro, daxil olan zənglərin - 0,11 avro təşkil edəcək. Bütün qiymətlər ƏDV-siz hesablanıb.
Bununla yanaşı, 2009-cu ilin iyulun 1-dən mobil rabitə operatorları saniyə hesabı tariflər təyin etməlidir, lakin onlara zəngin minimal qiymətini 30 saniyənin qiyməti səviyyəsində müəyyənləşdirmək icazəsi verilir.
Həmçinin bildirilir ki, rouminqdə SMS-in maksimal qiyməti 0,11 avro (ƏDV-siz) olmalıdır. «Mobil internet» adlanan xidmətdə rouminqdə bir meqabaytın istifadəsinin maksimal tarifi bu il iyulun 1-dən 1 avro, 2010-cu ilin iyulun 1-dən 0,80 avro, 2011-ci ilin iyulun 1-dən – 0,50 avro səviyyəsində təyin olunub.
Xatırladaq ki, ötən il Avropa Komissiyası mobil rabitə operatorlarının daxili hesablamaları üçün tətbiq etdikləri tarifləri real dəyərdən artıq olduğunu bəyan edib. Bununla bağlı Avropanın vahid telekommunikasiya nizamlayıcısı operatorlararası telefon tariflərinin eyniləşdirilməsini nəzərdə tutan layihə hazırlayıb.
Avropa İttifaqına üzv olan 27 ölkənin demək olar ki, bütün operatorları zəngin bir şəbəkədən digərinə yönəldilməsi üçün əlavə haqq tutur və bu, danışığın qiymətinə təsir göstərir. Avropa İttifaqına təqdim olunmuş məlumata əsasən, zəngin bir şəbəkədən digərinə istiqamətləndirilməsi üçün tutulan haqq ölkədən asılı olaraq 2-18 avrosent təşkil edib. Bu, stasionar rabitə operatorlarının analoji tarifindən 9 dəfə çoxdur.
Azərbaycan Rabitə və İnformasiya Texnologiyaları Nazirliyindən isə «APA-Economics»ə bildirilib ki, Avropada gözlənilən tarif dəyişiklikləri gələcəkdə Azərbaycandakı rouminq tariflərinə də təsir göstərə bilər.
Qeyd edək ki, hazırda Azərbaycanda beynəlxalq danışığın 1 dəqiqəsinin qiyməti operatordan və ölkədən asılı olaraq 0,30-0,70 AZN (0,36-0,84 ABŞ dolları) diapazonunda dəyişir. SMS-ə gəldikdə, bu göstərici ərazidən asılı olmayaraq 0,05 AZN təşkil edir.