İnfrastruktur

Ana səhifə

İnfrastruktur

Azərbaycan Çində keçirilən «Yay Davosu» forumunda iştirak edib

16 sentyabr 2011 15:30 (UTC +04:00)

Bakı. Nicat Mustafayev - APA-Economics. Dalyan şəhərində (Çin) Dünya İqtisadi Forumunun beşinci illik iclası («Yay Davosu») keçirilib.

Rabitə və İnformasiya Texnologiyaları Nazirliyindən «APA-Economics»ə verilən məlumata görə, tədbirdə Azərbaycanı rabitə və informasiya texnologiyaları naziri Əli Abbasovun rəhbərlik etdiyi nümayəndə heyəti təmsil edib.

«İqtisadiyyatın keyfiyyətli inkişafı» mövzusunda keçirilmiş tədbirdə 100-ə yaxın ölkədən 2 500 nümayəndə, o cümlədən bir sıra ölkələrin dövlət və hökumət başçıları, regional təşkilatların və iri şirkətlərin rəhbərləri iştirak ediblər. Forum çərçivəsində keçirilən elm, texnologiya və innovasiyalar mövzusunda iclasda informasiya texnologiyalarının gələcək inkişafı, onun cəmiyyətdə müxtəlif sahələrdə tətbiqinin faydasından danışılıb.

Nazir Ə.Abbasov bu sahədə Azərbaycanda görülən işlər, əldə olunmuş nailiyyətlər və perspektiv layihələrdən bəhs edib. O, Azərbaycan neft-qaz ölkəsi olmasına baxmayaraq, dövlət başçısı tərəfindən informasiya-kommunikasiya texnologiyaları (İKT) sektorunun inkişafına böyük diqqət yetirildiyi, enerji sahəsindən sonra İKT-nin ölkə iqtisadiyyatında prioritet sahələrdən birinə çevrilməsinin əsas məqsədlərdən biri olduğunu bildirib.
Dünya İqtisadi Forumunun rəqəmsal iqtisadiyyat problemlərinin ölkələr arasında əlaqələndirilməsi ilə məşğul olan Hökumət Qrupunun ilk iclasında Azərbaycanda texnoloji inkişaf və Avrasiyada regional layihələrdə, xüsusən «Trans Avrasiya Super İnformasiya Magistralı» (TASİM) layihəsində fəal iştirakı yüksək qiymətləndirilib.

Qeyd olunub ki, TASİM layihəsinin məqsədi Qərb və Şərq arasında super informasiya magistralının yaradılması, region ölkələrinin İKT-yə çıxış imkanlarının genişləndirilməsidir. Magistral Şərqi Avropa, MDB ölkələri, Türkiyə, Mərkəzi Asiya ölkələrini, Çini birləşdirərək, eləcə də bu regionda dünyanın yeni nəhəng transmilli informasiya şəbəkəsinin təşkil olunması üçün əlverişli şərait yaradacaq. TASİM-in dünyanın 20-dən çox ölkəsini əhatə edəcəyi nəzərdə tutulub.

Bundan başqa, forum çərçivəsində Ə.Abbasov Çinin elm və texnologiya naziri Van Qanq, Hindistanın planlaşdırma, elm və texnologiya üzrə dövlət naziri Aşvani Kumar, Pakistanın elm və texnologiya naziri Mir Çingiz Xan Camali, Çinin «HUAWEI», ABŞ-ın «WYSE Technology», Böyük Britaniyanın «British Telecom» və maraq doğuran digər şirkətlərin rəhbərləri ilə ikitərəfli görüşlər keçirib.

Görüşlərdə əsasən İKT sahəsində ikitərəfli əməkdaşlıq əlaqələrinin inkişafı və genişlənməsi, bu sahədə keçirilən beynəlxalq sərgilərdə qarşılıqlı iştirakın təmin olunması və mütəxəssislərin elmi-mübadiləsinin aparılması, xarici şirkətlərin Azərbaycanın İKT sektoruna sərmayə qoyuluşunun təşviqi, habelə Azərbaycan şirkətlərinin beynəlxalq bazarlara çıxışı imkanları müzakirə olunub, Azərbaycan iqtisadiyyatının, o cümlədən İKT sektorunun inkişafı bütün dünyada maraq doğurduğu qeyd edilib.