İnfrastruktur

Ana səhifə

İnfrastruktur

“Bakı Ağ Şəhər” layihəsi “MIPIM Asia Awards 2011” müsabiqəsində finala çıxıb

19 sentyabr 2011 14:14 (UTC +04:00)

Bakı. Vahab Rzayev - APA-Economics. “Bakı Ağ Şəhər” layihəsi “MIPIM Asia Awards 2011” (Honkonq) müsabiqəsinin «Mərkəzi və Qərbi Asiyanın ən yaxşı gələcək layihəsi» nominasiyasında finala çıxıb.

Layihədən “APA-Economics”ə verilən məlumata görə, bu nominasiyada “Bakı Ağ Şəhər” layihəsi ilə bərabər «Şimali Qafqazın Kurortları» ASC turizm klasterinin layihəsi, həmçinin “Kohn Pedersen Fox Associates” şirkəti tərəfindən təqdim edilən “Abu Dhabi International Airport Midfield Complex” layihəsi seçilib.

Qeyd edək ki, “MIPIM Asia Awards 2011” Sakit okean regionunda daşınmaz əmlak və investisiyaların ən iri sərgisinin münsiflər heyətinin tərkibinə Sinqapur, Honkonq, Fransa, Rusiya və digər ölkələrin daşınmaz əmlak sahəsində aparıcı ekspertləri daxildir.

“MIPIM Asia Awards 2011” müsabiqəsinin finalında ümumilikdə 80 ölkədən 29 layihə iştirak edib. Onlara Çin, Hindistan, Sinqapur, Avstraliya, Honkonq, İndoneziya, Yaponiya, Malayziya, Cənubi Koreya, Tayvan, Tailand, BƏƏ və Azərbaycanı göstərmək olar. Layihələr «Ən yaxşı biznes mərkəzi», «Ən yaxşı «yaşıl» bina», «Ən yaxşı hotel və kurort zonası», «Ən yaxşı qarışıq tipli bina», «Ən yaxşı yaşayış binası» kimi nominasiyalarda və «Ən yaxşı Çinin gələcək layihəsi», «Ən yaxşı ticarət mərkəzi» və «Şəhər tikililərinin yeniləşdirilməsi üzrə ən yaxşı layihə» kimi digər nominasiyalarda da təqdim olunublar.

Qaliblərin adı münsiflər heyətinin qapalı səsverməsinin, həmçinin sərgi iştirakçılarının onlayn rejimdə virtual qiymətlərinin nəticələrinə əsasən 2011-ci ilin noyabrın 16-da məlum olacaq.

Xarici investisiyaları Sakit okean regionunda tikintiyə cəlb etmək, həmçinin regional investorlar üçün effektiv əlaqələri təşkil etmək məqsədini daşıyan “MIPIM Asia” beynəlxalq daşınmaz əmlak sərgisi 2006-cı ildən hər il Honkonqda keçirilir.

Qeyd edək ki, “Bakı Ağ Şəhər” layihəsi «Azərbaycan Respublikasında 2006-2010-cu illərdə ekoloji vəziyyətin yaxşılaşdırılması üzrə kompleks tədbirlər planı»nın təsdiq olunması haqqında Azərbaycan prezidentinin fərmanı çərçivəsində həyata keçirilir. Layihə haqqında daha ətraflı məlumatı www.bakuwhitecity.az. saytından əldə etmək olar.