İnfrastruktur

Ana səhifə

İnfrastruktur

Azərbaycan-Avstriya biznes-forumu çərçivəsində “Elektron hökumət tərəfindən ictimai xidmətlər” mövzusunda panel keçirilib

20 sentyabr 2011 12:23 (UTC +04:00)

Bakı. Nicat Mustafayev - APA-Economics. Bakıda keçirilən Azərbaycan-Avstriya biznes-forumu çərçivəsində “Elektron hökumət tərəfindən ictimai xidmətlər” mövzusunda panel keçirilib.

“APA-Economics”in məlumatına görə, paneldə çıxış edən Azərbaycanın rabitə və informasiya texnologiyaları nazirinin müavini Elmir Vəlizadə qeyd edib ki, Azərbaycanda İKT sektoru iqtisadiyyatın aparıcı sahəsinə çevrilir: «Bizim bu sahədə inkişafa yönəldilmiş planlarımız genişdir. Azərbaycan beynəlxalq təcrübədən istifadə edir və Avstriyanın təcrübəsi də bizim üçün maraqlı ola bilər».

Öz növbəsində paneldə iştirak edən Avstriyanın Federal Kanslerliyinin «Elektron hökumət» üzrə icraçı baş katibi Kristian Rupp «Avstriya beynəlxalq model olaraq» təqdimatı ilə çıxış edib, ölkədə İKT sahəsində tətbiq olunan yeniliklər haqda məlumat verib.

Panel çərçivəsində hər iki ölkənin rəsmiləri təcrübə mübadiləsində maraqlı olduqlarını bildirib, həmçinin İKT sahəsində mövcud vəziyyət və əməkdaşlıq perspektivləri müzakirə olunub.

Qeyd edək ki, Avstriya nümayəndə heyətinin Bakıya səfəri çərçivəsində sentyabrın 19-20-də Azərbaycan-Avstriya biznes-forumu təşkil olunub. Biznes-forum çərçivəsində nəqliyyat, alternativ enerji, mədəniyyət və turizm sahələrinə dair panellər keçirilib.