İnfrastruktur

Ana səhifə

İnfrastruktur

“Bakı Ağ Şəhər layihəsi” Dubayda keçirilən beynəlxalq sərgidə mükafat alıb

30 sentyabr 2011 13:42 (UTC +04:00)

Bakı - APA-Economics. Bu il sentyabrın 27-29-da Dubayın (BƏƏ) “DİCEC” sərgi mərkəzində daşınmaz əmlak və investisiya sahəsində ən iri tədbir olan “Cityscape Global 2011” beynəlxalq sərgisi keçirilib.

“APA-Economics”in xəbərinə görə, sərgidə 120 ölkədən 1000-dən artıq şirkət və 60 000 rieltor iştirak edib.

“Cityscape Awards” müsabiqəsinin finalına BƏƏ (Traditional Suq in Shindagha, Dubai Municipality), Səudiyyə Ərəbistanı (Capital Gate, Johnson-Marshall & Partners), Azərbaycanın (Baku White City), Hindistanın (D HOTEL, Sannjay Puri Architects Pvt Ltd) və Çinin (Shijiazhuang International Convention & Exhibition Center, Woods Bagot) layihələri vəsiqə qazanıblar.
Memarlıq və şəhərsalma sahəsində beynəlxalq ekspertlərdən ibarət olan müsabiqənin münsiflər heyəti “Bakı Ağ Şəhər” layihəsini ən yaxşı şəhərsalma layihəsi elan edib. “Cityscape Global” sərgisinin iştirakçıları arasında dünyada ən böyük süni adası sayılan Dubayın “Palm Jumeira” layihəsi, dünyanın ən hündür göydələni olan “Burj Khalifa” binası, möhtəşəm “Down Town” kompleksi, Səudiyyə Ərəbistanının “Diplomatic Quarter” konsert kompleksi, Çinin “Run Run Shaw” Kreativ Media Mərkəzi, Sinqapurun Fusionopolisi və digər bu kimi dünya şöhrətli layihələr təmsil olunub.

“Bakı Ağ Şəhər” layihəsinin təltif olunma mərasimi məşhur “Madinat Jumeirah” hotelində təntənəli şam yeməyi zamanı baş tutub.

Qeyd edək ki, Bakının yeni müasir mərkəzinə çevriləcək “Bakı Ağ Şəhər” şəhərsalma layihəsi Azərbaycan prezidenti cənab İlham Əliyevin “2006-2010-cu illərdə Azərbaycan Respublikasında ekoloji vəziyyətin yaxşılaşdırılması üzrə kompleks tədbirlər planı”nın təsdiq edilməsi haqqında fərmanının icrası çərçivəsində Bakı Şəhər İcra Hakimiyyətinin başçısı H.Abutalıbovun 11 iyun 2007-ci il tarixli sərəncamına əsasən həyata keçirilir. “Bakı Ağ Şəhər” layihəsi üzrə aparılan işlərə azərbaycanlı mütəxəssislərlə birgə «Atkins» (Böyük Britaniya), “Foster + Partners” (Böyük Britaniya) və «F+A Architects» (ABŞ) şirkətləri də cəlb olunub.