İnfrastruktur

Ana səhifə

İnfrastruktur

Azərbaycan Cenevrədə keçirilən «ITU Telecom World» tədbirində iştirak edir

24 oktyabr 2011 10:02 (UTC +04:00)

Bakı. Nicat Mustafayev – APA-Economics. Bu gün Cenevrədə (İsveçrə) «ITU Telecom World 2011» tədbiri işə başlayıb. Azərbaycan Rabitə və İnformasiya Texnologiyaları Nazirliyindən «APA-Economics»ə verilən məlumata görə, sözügedən tədbirdə Azərbaycanı rabitə və informasiya texnologiyaları naziri Əli Abbasovun başçılıq etdiyi nümayəndə heyəti təmsil edir. Nümayəndə heyətinə nazirlik əməkdaşları ilə yanaşı digər dövlət orqanların və İT şirkətlərin nümayəndələri daxildir.

«ITU Telecom 2011» çərçivəsində həmçinin qlobal telekommunikasiya və informasiya texnologiyalarına həsr edilən sərgi keçiriləcək. Azərbaycan sərgidə Rabitə və İnformasiya Texnologiyaları Nazirliyinin təşkil etdiyi ayrıca Milli Pavilyonla təmsil olunur. Ümumilikdə, pavilyon ölkənin son illər informasiya texnologiyaları sahəsində əldə etdiyi uğurları nümayiş etdirəcək. Stendlərdə ölkədə həyata keçirilən layihələrlə tanış olmaqla, qonaqlara müxtəlif sahələrdə yeni texnologiyaların tətbiqindən bəhs edən təqdimatlar nümayiş etdiriləcək. Sərgidə dövlət sektoru ilə yanaşı, həm yerli, həm də Azərbaycanda fəaliyyət göstərən xarici özəl İT şirkətlər təmsil olunmaqla öz layihə, ideya və həllərini göstərəcək.

Qeyd edək ki, «ITU Telecom World 2011» tədbirinin təşkilatçısı qismində Beynəlxalq Telekomunikasiya İttifaqı (ITU) çıxış edir. Tədbir İKT sektorunun qlobal məsələlərini müzakirə edəcək dövlət və hökumət başçılarını, nazir, İT şirkət rəhbərlərini, məsləhətçi və müşavirləri, yüksək texnologiyalar sahəsinin novatorlarını birləşdirir.

Tədbirin üçgünlük proqramının əsas hadisələrinə dünya telekommunikasiyalarının problem və inkişaf perspektivləri, o cümlədən genişzolaqlı rabitənin inkişafı, gələcək nəsil şəhər mühitinin (rəqəmsal şəhərlər) müzakirələri, bulud hesablamalarının sürətli inkişafı, informasiya təhlükəsizliyinin və məlumatların məxfiliyinin təmini məsələləri və s. daxildir.

Xatırladaq ki, hazırkı «ITU Telecom World 2011» sərgisi 1971-ci ildə keçirilən ilk tədbirin 40 illiyi ilə əlamətdardır.