İnfrastruktur

Ana səhifə

İnfrastruktur

Vergilər Nazirliyinin Telefon Məlumat Xidməti vahid Avropa standartına uyğunluq barədə sertifikat alıb

24 oktyabr 2011 13:35 (UTC +04:00)

Bakı. Əli Əhmədov - APA-ECONOMICS. Vergilər Nazirliyinin 195 telefon məlumat xidmətinə “Austrian Standards plus” təşkilatı tərəfindən “EN-15838 Standartı”na uyğunluq sertifikatı verilib.

Nazirliyin «APA-ECONOMICS»ə məlumatına görə, sentyabr ayında “Austrian Standards plus” təşkilatı Vergilər Nazirliyinin Telefon Məlumat Xidmətinin “EN-15838 Standartı”na uyğunluğunu yoxlamaq üçün audit keçirib. Audit 6 istiqamətdə 59 meyar əsasında aparılıb. Auditin nəticələrinə əsasən, oktyabrın 15-də nazirliyin məlumat xidmətinə EN-15838 Standartlarına uyğunluq barədə sertifikat verilib.

Nazirliyin vergi ödəyicilərinə xidmət idarəsinin rəisi Elçin Məmmədovun sözlərinə görə, postsovet məkanında belə sertifikat ilk dəfə olaraq Azərbaycanın vergi qurumuna verilib. İndiyədək Rusiya və Ukraynada iki şirkət buna layiq görülüb, amma bunların vergi sistemi ilə əlaqəsi yoxdur.

Qeyd edək ki, sorğu mərkəzlərinin idarəetmə sistemi üzrə vahid Avropa standartını müəyyən edən sertifikatlaşdırma qurumu olan “Austrian Standards plus” təşkilatı dünya üzrə iqtisadiyyatın, elm və texnikanın müxtəlif sahələrini təmsil edən 200 komitənin və 5600-dən çox ekspertin fəaliyyətini əlaqələndirir.

Qeyd edək ki, Vergilər Nazirliyinin 195 Telefon Məlumat Xidməti 2003-cü ilin dekabr ayından Bakı şəhərini, 2006-cı ilin may ayından etibarən isə respublikanın bütün regionlarını əhatə etməklə fəaliyyətə başlayıb və hazırda fasiləsiz rejimdə müxtəlif xidmətlər göstərir. İş günlərində saat 09:00-dan 18:00-dək canlı rejimdə vergi qanunvericiliyinə dair sualların cavablandırılması, vergi hüquqpozmaları barədə müraciətlərin qəbulu, elektron xidmətlər barədə müraciətlərin cavablandırılması, günün pik vaxtlarında buraxılmış zənglərlə bağlı əks əlaqənin yaradılması kimi xidmətlər göstərilir. Avtomatik rejimdə isə vergi ödəyicilərinə vergi növləri və VÖEN-ə görə vergi borcu barədə məlumat verilir.