İnfrastruktur

Ana səhifə

İnfrastruktur

Bu il Azərbaycanda dəmiryoluna 124 mln. vəsait xərclənib

25 oktyabr 2011 12:34 (UTC +04:00)

Bakı. Əli Əhmədov - APA-ECONOMICS. Bu ilin ilk 9 ayında dəmir yollarının inkişafına 124 mln. manat vəsait sərf olunub. «APA-ECONOMICS»in məlumatına görə, bu barədə prezident İlham Əliyevin sədrliyi ilə Nazirlər Kabinetində keçirilən müşavirədə nəqliyyat naziri Ziya Məmmədov bildirib.

Onun sözlərinə görə, yanvar-sentyabr aylarında dəmir yolunda 27,4 km yol əsaslı və orta təmir edilib, 11 elektrik və dizel lokomotivi, 212 sərnişin vaqonu, 2886 ədəd isə müxtəlif çeşidli yük vaqonları təmirdən keçirilərək istismara verilib.

Nəqliyyat naziri bildirib ki, hazırda Bakı-Tilfis-Qars dəmir yolunun Axalkələk-Kartsaxi hissəsində yer yatağının hazırlanması və süni qurğuların inşası və Kartsaxidə stansiya binasının tikintisi həyata keçirilir. Həmçinin Axalkələk stansiyasının və Türkiyə-Gürcüstan sərhədində tikiləcək 4,2 km uzunluğunda tunelin layihələndirilməsi işləri aparılır. Eyni zamanda yolun 153 km-lik Marabda-Axalkələk sahəsinin 3 mərhələdən ibarət reabilitasiya və rekonstruksiyasının I mərhələsində işlər davam etdirilib.

Paralel olaraq dəmir yolunun bu marşrut üzərində yerləşən infrastrukturunun yeniləşdirilməsi tədbirləri müəyyən edilib və “Azərbaycan Respublikasında dəmir yolu nəqliyyatı sisteminin 2010-2014-cü illərdə inkişafına dair Dövlət Proqramı”nın icrasına başlanılıb.

Z.Məmmədov bildirib ki, su nəqliyyatının inkişaf etdirilməsi məqsədilə 2011-ci ildə dövlət büdcəsindən ayrılmış vəsait hesabına 2 ədəd bərə alınaraq istismara verilib, 2 ədədinin isə Xorvatiyanın Pula şəhərində tikintisinə başlanılıb, bir ədəd üzən dokun hazırlanması üçün də sifariş verilib. Bundan əlavə, Gəmi Təmiri Zavodunun köçürülməsi və ərazinin təmizlənməsi işləri həyata keçirilib və Xəzər Dəniz Gəmiçiliyinin daxili imkanları hesabına müasir gəmi təmiri zavodunun tikintisinə başlanılıb.