İnfrastruktur

Ana səhifə

İnfrastruktur

Ucar və Zərdab şəhərlərinə su təchizatı üzrə yeni mənbə seçilib

09 dekabr 2011 13:10 (UTC +04:00)

Bakı - APA-Economics. “Azərsu” ASC bu ilin ikinci rübündən icrasına başlanmış Ucar və Zərdab şəhərlərinin su təchizatı və kanalizasiya sistemlərinin yenidənqurulması layihəsi üzrə yeni mənbə seçib.

“Azərsu” ASC-nin Mətbuat xidməti və ictimaiyyətlə əlaqələr şöbəsindən “APA-Economics”ə verilən məlumata görə, əvvəlki layihələrdə Zərdab şəhərinə Kür çayından, Ucar şəhərinə isə Göyçay rayonu ərazisində qazılacaq subartezian quyulardan suyun verilməsi nəzərdə tutulurdusa, yeni layihədə hər iki rayon mərkəzinə, eləcə də bu rayonların 50-yə yaxın kəndinə Ağsu rayonu ərazisində yerləşən Külüllü mənbəyindən keyfiyyətli su veriləcək.

Aparılmış tədqiqat işlərinin nəticələrinə əsasən Girdiman çayının məcrasında yerləşən Külüllü mənbəyindən saniyədə 500 litr və ya sutkada 40 min kubmetr içməli su götürmək olar. Avropa Birliyinin və Ümumdünya Səhiyyə Təşkilatının standartlarına cavab verən mənbədən həmçinin Kürdəmir və Ağsu şəhərlərinə və bu rayonların 30-dan artıq kəndinə də su veriləcək. Külüllü su mənbəyi dəniz səviyyəsindən 170 metr yüksəklikdə yerləşdiyindən, bu imkan verir ki, buradan Zərdab, Ucar, Kürdəmir və Ağsu şəhərlərinə, həmçinin magistral kəmərin keçəcəyi əraziyə yaxın kəndlərə içməli su özüaxımlı rejimdə ötürülsün. Bu elektrik enerji xərclərini sıfıra endirməklə, istehlakçıların fasiləsiz su təminatına imkan verəcək.

Qeyd edək ki, hazırda Kürdəmir şəhərinin bir hissəsi Külüllüdən götürülən su ilə təmin olunur. Ucar, Zərdab şəhərləri və ətraf kəndlərin sakinləri çay və kanal suyundan istifadə edir. Bu ilin ikinci yarısından Kürdəmir, Ucar və Zərdab şəhərlərində su təchizatı və kanalizasiya sistemlərinin yenidən qurulmasına başlanıb. Layihəyə uyğun olaraq Zərdab və Ucarda işlər 2012-ci ilin sonlarında, Kürdəmirdə isə 2013-cü ildə başa çatdırılacaq.