İnfrastruktur

Ana səhifə

İnfrastruktur

Gələn ildən Rusiyada “Tax-free” tətbiq olunacaq

14 dekabr 2011 14:05 (UTC +04:00)

Bakı. Əli Əhmədov - APA-Economics. Gələn ildən etibarən Rusiya mağazalarından mal alan xarici turistlər “tax-free” xidmətindən istifadə edərək ölkədən çıxanda həmin mallara görə ödənilmiş əlavə dəyər vergisini geri ala biləcəklər. «APA-Economics»in məlumatına görə, bu barədə Rusiyanın «RİA Novosti» agentliyi məlumat yayıb.

«Tax-free» xidmətini təqdim edən “Mark prior” şirkətinin məlumatına görə, ƏDV-nin rəsmiləşdirilməsi üçün minimum alqı-satqı məbləği 10 min rubl (250 manat) təşkil etməlidir. Tutulan verginin 2%-i xidməti göstərən təşkilata çatacaq. ƏDV-nin qalan hissəsi (adi mallarda 17%, uşaq üçün mallarda 8%) isə turistə qaytarılacaq.

Şirkətdə bildirirlər ki, Rusiyada ƏDV-nin qaytarılması nəzərdə tutulan malların siyahısı Avropanın əksər ölkələrinə nisbətən genişdir. ƏDV-nin qaytarılması prosesi malın mağazada alınmasından başlayır. Burda alıcı üçün gömrük bəyannaməsi tərtib edilir. Bu sənəd verginin qaytarılması üçün əsas sənəddir. Onu və alqı-satqı qəbzini aeroporta qədər saxlamaq lazımdır. Verginin qaytarılmasının rəsmiləşdirilməsi aeroportda həyata keçirilir. Qaytarılan vergi müştərinin plastik kartına köçürülə və ya çek formasında onun elektron poçtuna göndərilə bilər. Pulun qaytarılması prosesi 3 ayadək davam edə bilər. Xidməti göstərən şirkətin saytında müştəri onun ƏDV-ni qaytarması ilə bağlı müraciətinin necə yerinə yetirildiyini izləyə də bilər.

Şirkətin məlumatına görə, belə sistemin tətbiq olunması ölkəyə gələn turistlərin sayının artmasına kömək edəcək və onları Rusiyada mal almağa həvəsləndirəcək. «Tax-free» layihəsində təkcə mağazalar yox, ödəmə terminalları da iştirak edə bilərlər - mağaza və ya digər obyektlərin bu sistemə qoşulduğunu bildirmək üçün onların üzərində turist nişanı olacaq. Bu, turistlərə həmin mağazada «Tax-free» xidmətinin olduğunu bildirəcək.

«Tax-free» sistemi əvvəlcə Moskva və Sankt-Peterburqda işləməyə başlayacaq, sonra isə Soçidə tətbiq ediləcək. Qeyd edək ki, hər il Rusiyaya 6,2 mln. turist gəlir, onların etdiyi alqı-satqının orta məbləği 300 avro təşkil edir.