İnfrastruktur

Ana səhifə

İnfrastruktur

ERA şirkəti Heydər Əliyev Beynəlxalq Hava Limanını Hava Hərəkətini İdarə və Nəzarət Sistemi ilə təchiz edəcək

16 dekabr 2011 12:58 (UTC +04:00)

Bakı. Rəşad Süleymanov - APA-Economics. Avropada aviasiya nəzarət sistemlərinin istehsalı üzrə ixtisaslaşmış ERA şirkəti Bakı Heydər Əliyev Beynəlxalq Hava Limanını Hava Hərəkətini İdarə və Nəzarət sistemi (A-SMGCS) ilə tam təchiz edəcək. “APA-Economics”in xəbərinə görə, bu barədə ERA şirkətinin yaydığı məlumatda bildirilib.

Şirkət bu məqsədlə «Azərbaycan Hava Yolları» QCS-nin elan etdiyi tenderdə iştirak edərək qalib olub.

Məlumatda qeyd olunub ki, son 10 il ərzində Heydər Əliyev Beynəlxalq Hava Limanında uçuşların sayında 240% artım qeydə alınıb. Bu, Qafqazda ən böyük göstərici deməkdir. Aeroportun inkişafı və hərəkətdə artımla əlaqədar uçuş-eniş zamanı hadisə riskini azaltmaq üçün hava limanında əlavə nəzarəti həyata keçirmək lazım gəlir.

ERA-nın icraçı direktoru Vladislav Hofman bildirib ki, bu müqavilə Azərbaycan Hava Naviqasiya Xidmətinin (AZANS) Xəzər dəniz üzərində aşağıdan uçan helikopter və təyyarələrə nəzarət etmək üçün imkanlarını daha da artıracaq.

Qeyd edək ki, ERA şirkəti hava hərəkətlərinin idarə edilməsi, hərbi, təhlükəsizlik və aeroport əməliyyatları üçün həllər, izləmə-nəzarət sistemləri istehsal edir. Şirkətin sistemləri 35-dən çox ölkənin 100 hava limanında hava nəqliyyatının idarə edilməsində tətbiq olunur. Həmçinin müxtəlif regionlarda onlarla hərbi qurum tərəfindən istifadə edilir.