İnfrastruktur

Ana səhifə

İnfrastruktur

Böyük Britaniyanın Azərbaycandakı səfiri İctimai Teleradioda olub – FOTO

Böyük Britaniyanın Azərbaycandakı səfiri İctimai Teleradioda olub – <font color=red>FOTO </font>

17 dekabr 2011 17:03 (UTC +04:00)

Bakı. Ülkər Qasımova – APA. Böyük Britaniyanın Azərbaycana yeni təyin olunmuş səfiri Piter Beytman İctimai Televiziya və Radio Yayımları Şirkətində olub. İctimai Teleradionun ictimaiyyətlə əlaqələr və monitorinq şöbəsindən APA-ya verilən məlumata görə, tanışlıq xarakteri daşıyan görüşdə qonağa teleradionun yaranması, texniki və yaradıcı potensialı, beynəlxalq əlaqələri haqqında ətraflı məlumat verilib.
İctimai Teleradionun baş direktoru İsmayıl Ömərov bildirib ki, fasiləsiz yayımlanan televiziya milli kanal kimi reytinq axtarışından uzaq, informasiya və maarifləndirməni ana xətt kimi qəbul etməklə, cəmiyyətdə birlik və harmoniya yaratmağı qarşıya məqsəd qoyub. 6 il öncə fəaliyyətə başlayarkən Böyük Britaniyanın BBC korporasiyasının təcrübəsindən də faydalanıb və bu, şirkətin işinin qurulmasında əhəmiyyətli rol oynayıb. Hazırda İctimai Televiziya Avropa Yayımları Birliyinin Azərbaycandan olan yeganə üzvü və «Eurovision» mahnı müsabiqəsinin ölkə üzrə təşkilatçı-yayımçısıdır. Azərbaycanın 2008-ci ildən «Eurovision» müsabiqəsində iştirak etdiyini deyən İ.Ömərov ölkəmizin 4 il ərzində bu layihədə uğurla çıxış etdiyini və 2011-ci ildə Düsseldorf yarışmasında qələbə qazandığını xatırladıb. Azərbaycanın «Eurovision» müsabiqəsində iştirakının ilk günündən Heydər Əliyev Fondunun prezidenti Mehriban Əliyevanın bu layihəyə böyük dəstək verdiyini deyən baş direktor 2012-ci ildə Bakıda təşkil olunacaq müsabiqəyə hazırlıqların uğurla davam etdiyini diqqətə çatdırıb.
Bundan başqa, İctimai Televiziya Kann kino festivalı, Vyana Filarmoniya Orkestrinin konsertləri, 2012-ci il London Yay Olimpiya Oyunları, UEFA Avropa Liqası və digər nüfuzlu beynəlxalq layihələrin rəsmi yayım hüququna sahibdir. Görüşdə İctmai Teleradionun dünyanın böyük telekorporasiyaları ilə intensiv əməkdaşlıq etdiyi, həmin kanallarla müştərək proqramlar və canlı telekörpülərin hazırlandığı bildirilib.
Səfir P.Beytman Böyük Britaniya ilə Azərbaycan arasında münasibətlərin strateji əməkdaşlıq səviyyəsində olduğunu, xüsusilə iqtisadi əlaqələrin sürətlə inkişaf etdiyini deyib. O, Azərbaycanın BMT-nin Təhlükəsizlik Şurasına qeydi-daimi üzv seçilməsi və «Eurovision-2012»yə ev sahibliyi etməsini önəmli hadisələr kimi qiymətləndirib. Cənab P.Beytman bu hadisələrin ölkənin beynəlxalq nüfuzunun güclənməsində vacib rol oynayacağını qeyd edib. P.Beytman səfir kimi fəaliyyət göstərəcəyi müddətdə iki ölkə arasında münasibətlərin, xüsusilə də media sahəsini əhatə edən əlaqələrin genişlənməsinə çalışacağını vurğulayıb. İctimai Teleradionun fəaliyyətə başlamasından qısa müddət keçməsinə baxmayaraq şirkətin yaradıcı və texniki imkanlarının onda xoş təəssürat yaratdığını qeyd edib.
Səfir gələcəkdə Böyük Britaniyanın digər televiziya kanalları ilə də əlaqələrin qurulacağına inandığını qeyd edib. «Eurovision-2012» hazırlıqları ilə maraqlanan qonaq İctimai Teleradionun studiyaları ilə də tanış olub.