İnfrastruktur

Ana səhifə

İnfrastruktur

“Azərsu” Biləsuvarda Cəbrayıldan olan köçkünlərin su təminatını yaxşılaşdırıb

19 dekabr 2011 13:22 (UTC +04:00)

Bakı. Əli Əhmədov - APA-Economics. Biləsuvar rayonu ərazisində Cəbrayıl rayonundan olan məcburi köçkünlər üçün salınmış 6 qəsəbədə içməli su təchizatının yaxşılaşdırılması layihəsi başa çatıb.

“Azərsu” ASC-dən «APA-Economics»ə verilən məlumata görə, su təchizatı sisteminin istifadəyə verilməsi ilə əlaqədar təşkil olunmuş mərasimdə çıxış edən “Azərsu” ASC-nin sədri Qorxmaz Hüseynov bildirib ki, məcburi köçkün qəsəbələrinin su təchizatının yaxşılaşdırılması layihəsinin icrasına 2011-ci ilin may ayında başlanıb. Su təchizatı sistemlərinin yenidən qurulması layihəsinə uyğun olaraq 6 qəsəbədə 12 km-ə yaxın magistral, 89 km uzunluğunda qəsəbədaxili su xətləri çəkilib, 2602 mənzilə və inzibati binaya qoşulma verilib.

Dayanıqlı su təchizatının aparılması üçün bu qəsəbələrin hər birində tutumu 100 kubmetr olan su anbarı, nasosxana inşa edilib, 18 ədəd nasos və 6 ədəd transformator quraşdırılıb. Layihənin icrası nəticəsində 6 qəsəbədə 12 minə yaxın məcburi köçkünün içməli su təchizatı əsaslı şəkildə yaxşılaşıb. Qəsəbələri içməli su ilə yaxınlıqda qazılmış 14 subartezian quyu təmin edir.

Tədbirdə çıxış edən baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov ölkə rəhbərliyinin qaçqın və məcburi köçkünlərə göstərdiyi diqqət və qayğı nəticəsində onların sıx məskunlaşdığı ərazilərdə yeni infrastruktur layihələrin həyata keçirildiyini bildirib.

Qeyd edək ki, “Azərsu” ASC Füzuli, Ağcabədi və Ağdam rayonlarında da məcburi köçkünlərin içməli su təchizatının yaxşılaşdırılması istiqamətində işlər görür.