İnfrastruktur

Ana səhifə

İnfrastruktur

Azərbaycanda mənzil almaq üçün ən azı 21 il pul yığmaq lazımdır - TƏHLİL

Azərbaycanda mənzil almaq üçün ən azı 21 il pul yığmaq lazımdır - <font color=red>TƏHLİL</font>

10 yanvar 2012 10:18 (UTC +04:00)

Bunu «APA-Economics»in statistik göstəricilər əsasında apardığı hesablamalar göstərir.

Belə ki, hesablamalarda istifadə olunan əhalinin aylıq pul gəlirlərinin həcmi 2,5 mlrd. manat təşkil edir. Dəqiqlik və obyektivliu üçün ölkənin tam əhalisi deyil, yalnız iqtisadi fəal əhalisinin sayı (4,6 mln. nəfər) götürülür ki, nəticədə adambaşına düşən orta aylıq gəlirin həcmi 544 manata bərabərdir. Qeyd edək ki, bu göstərici orta aylıq əmək haqqından (356 manat), ümumi arifmetik orta aylıq gəlirin həcmindən (278 manat) də yüksəkdir. Beləliklə, aparılan hesablamalar hətta nikbin ssenarini əks etdirir.

Dövlət Statistika Komitəsinin məlumatlarına görə, əhalinin gəlirlərinin təxminən 25%-i əmanətlərin və kapitalın artırılmasına, yəni yığıma yönəldilir. Qeyd edək ki, dünya praktikasında makroiqtisadi təhlildə gəlirlərin hansı hissəsinin yığıma yönəldilməsi ilə bağlı heç bir norma olmasa da, gəlirlərin ¼-nin yığıma yönəldilməsi məqbul hesab oluna bilər. Beləliklə, Azərbaycanda yığıma hər ay təxminən 136 manat yönəldilə bilər.

Daşınmaz əmlak bazarında konsaltinq və araşdırmalar aparan «MBA Ltd.» şirkətinin hesablamalarına görə, ilkin mənzil bazarında 1 otaqlı mənzilin qiyməti təxminən 43,6 min ABŞ dolları və ya 34,3 min manat təşkil edir. Qeyd edək ki, bir nəfərin gəlirləri nəzərə alınmaqla aparılan hesablamalarda məhz ən ucuz başa gələn 1 otaqlı mənzilin alınması nəzərdə tutulur.

Nəticədə, ilkin bazarda 1 otaqlı mənzil almaq üçün orta statistik vətəndaş 252 ay və ya 21 il ərzində vəsait toplamalıdır. Aydındır ki, bunun müxtəlif variantları mümkündür. Məsələn, aylıq gəlir 544 manatdan və ya yığım hissəsi 25%-dən çox olduqda müddət azala bilər. Bu həmçinin iki nəfərlik ailədə hər iki üzv iqtisadi fəaliyyətlə məşğul olduqda mümkündür.

Müqayisə üçün bildirək ki, Rusiyada bu müddət 26 il təşkil edir. Bu göstərici üzrə dünya lideri ABŞ-dır - bu müddət cəmi 3 il təşkil edir. Avropa ölkələrində, Braziliya və Türkiyə kimi iri inkişafda olan ölkələrdə isə müddət 4-6 ilə bərabərdir. Qeyd edək ki, bu ölkələrdə hesablamalarda orta aylıq əmək haqqı və bazarda mənzillərin ortalama qiyməti nəzərə alınıb. Azərbaycanda isə məhz bu göstəricilər nəzərə alınarsa, həmin müddət daha da artacaq.