İnfrastruktur

Ana səhifə

İnfrastruktur

«Təmiz Şəhər»in ötən ilki fəaliyyəti ilə bağlı hesabat açıqlanıb

12 yanvar 2012 12:09 (UTC +04:00)

Bakı. Nicat Mustafayev - APA-Economics. Ötən il ərzində «Təmiz Şəhər» ASC tərəfindən bərk məişət tullantılarının yerləşdirilməsi və zərərsizləşdirilməsi sisteminin müasir standartlara uyğun qurulması və Bakının ekoloji vəziyyətinin yaxşılaşdırılması istiqamətində bir sıra tədbirlər həyata keçirilib.

Azərbaycan İqtisadi İnkişaf Nazirliyindən «APA-Economics»ə verilən məlumata görə, ötən illərdə Bakıda əmələ gələn tullantıların qəbulu və zərərsizləşdirilməsi işinin təşkili və təkmilləşdirilməsi işləri davam etdirilib. Belə ki, paytaxtın fəaliyyətdə olan yeganə rəsmi poliqonu - Balaxanı şəhər tullantılarının zərərsizləşdirilməsi poliqonunda abadlıq və yenidənqurma işləri həyata keçirilib. Bərk Məişət Tullantılarının Yandırılması Zavodunun tikintisi üzrə lazımi koordinasiya və təşkilati işlər davam etdirilib, 2012-ci ilin sonlarında zavodun istismara verilməsi planlaşdırılır. Poliqon ərazisində Yuma və Dezinfeksiya məntəqəsinin tikintisi üzrə işlər artıq yekunlaşdırılıb: 4 yuma kabinasından ibarət olan yuma və dezinfeksiya məntəqəsi beynəlxalq standartlara cavab verəcək və gün ərzində poliqon ərazisinə daxil olan 400-dən çox maşına xidmət göstərə biləcək. Məişət tullantılarının çeşidlənməsi və ölkədə təkrar istehsal biznesinin inkişaf etdirilməsi məqsədilə hazırda Balaxanı qəsəbəsində illik 200 min ton tullantı qəbul etmək gücünə malik olan yarım-avtomatik çeşidləmə məntəqəsinin tikintisi davam etdirilir. Məntəqə 2012-ci ilin ortalarında istismara veriləcək.

Bundan başqa, ötən il Dünya Bankının texniki dəstəyi ilə həyata keçirilən «Bərk məişət tullantılarının vahid idarəçiliyi» layihəsinin bütün komponentləri üzrə işlər davam etdirilib. Bu layihənin həyata keçirilməsi nəticəsində tullantıların idarə edilməsi sisteminin təkmilləşdirilməsi sahəsində əhəmiyyətli irəliləyişlərə nail olunacaq. Layihə çərçivəsində 2011-ci ildə «Təmiz Şəhər» ASC üçün maşın və texniki avadanlıqlar alınıb.

Həmçinin «Təmiz Şəhər» ASC tərəfindən məişət tullantılarının idarə edilməsi sahəsində Təmiz İnkişaf Mexanizmi üzrə iki potensial karbon krediti layihəsi işlənib. Bunlardan birincisi tullantıların yandırılması zavodunun fəaliyyəti nəticəsində ətraf mühitə atıla biləcək istilik effekti yaradan qazların azaldılması ilə bağlıdır. Digər layihə Balaxanı poliqonunun müasir standartlara uyğun bərpası və tullantıların çürüməsi nəticəsində əmələ gələn istilik effekti yaradan metan qazının ətraf mühitə atılmasının qarşısının alınması və onun emalı nəticəsində istilik və ya elektrik enerjisinin əldə edilməsi ilə bağlıdır.

Bununla yanaşı, 2011-ci ildə Heydər Əliyev Fondunun təşəbbüsü ilə «Təmiz Şəhər» ASC-nin Xəzər rayonunun Qala qəsəbəsində üzvi və qeyri-üzvi tullantıların ayrı-ayrılıqda yığılmasının və daşınmasının təşkili, «İçərişəhər» Dövlət Tarix-Memarlıq Qoruğu ilə birlikdə evlərdə və müəssisələrdə ilkin çeşidləmə üzrə pilot layihələr uğurla icra olunub. Həmin layihələr 2012-ci ildə də davam etdiriləcək.

Ötən il «Təmiz Şəhər» ASC tərəfindən ekoloji təmizlik istiqamətində bir sıra maarifləndirmə, yaşıllaşdırma aksiyaları da keçirib, Beynəlxalq Bərk Məişət Tullantılar Assosiasiyasının üzvlüyünə qəbul edilib. Bununla da ASC beynəlxalq əməkdaşlığı genişləndirməklə digər ölkələrin təcrübəsindən yararlanmaq və qlobal səviyyədə tullantıların idarə olunmasının bütün aspektləri üzrə məlumat və təcrübə mübadiləsi etmək hüququ əldə edib.