İnfrastruktur

Ana səhifə

İnfrastruktur

Bir qrup taksi sürücüsü Nəqliyyat Nazirliyinin qarşısında etiraz aksiyası keçirib - YENİLƏNİB

Bir qrup taksi sürücüsü Nəqliyyat Nazirliyinin qarşısında etiraz aksiyası keçirib - <font color=red>YENİLƏNİB</font>

16 yanvar 2012 13:35 (UTC +04:00)

“APA-Economics”in xəbərinə görə, aksiya iştirakçıları Nəqliyyat Nazirliyinin bəzi avtomobillərin taksi kimi fəaliyyətinə qadağa qoymasına etiraz ediblər.

Polis icazəsiz keçirilən aksiyaya müdaxilə edib və sürücüləri ərazidən uzaqlaşdırıb. Aksiya iştirakçılarından bir neçə nəfər Nəqliyyat Nazirliyinin rəsmiləri ilə görüşmək üçün nazirliyin binasına dəvət edilib. Görüşdən öncə jurnalistlərə açıqlama verən sürücülər bildiriblər ki, onlar siyasi tələblərlə çıxış etmədiklərini nazirliyin diqqətinə çatdıracaqlar: “Əsas tələbimiz odur ki, dolanışığımızı təmin etmək üçün işləməyimizə şərait yaratsınlar. Bunun üçün müəyyənləşdirilən vergiləri ödəməyə hazır olduğumuzu da onların diqqətinə çatdıracağıq”.

Mətbuatdan yalnız APA-nın əməkdaşının iştirak etdiyi görüşdə taksi sürücüləri nazirlik rəsmilərinə bir sıra təkliflər irəli sürüblər: “Əgər bu qadağa “Eurovision”a görədirsə, mahnı yarışması keçirilən dövrdə bizə şəhərin mərkəzinə gəlmək qadağan olunsun. Maşınlarımızı tətbiq olunan standartlara uyğun dəyişmək üçün bizə vaxt verilsin. İstifadəsinə icazə verilən maşınları hökumət gətirsin, biz də kreditlə pulunu verək. Avtomobillər üçün 2007-ci il göstəricisi aşağı çəkilsin, çünki qiyməti çox baha olduğundan, onları almaq imkanımız xaricindədir”.

Nazirlik nümayəndələri isə bildiriblər ki, tətbiq olunan standartlar müvəqqəti hal deyil, daimi olacaq: “Çünki qanunun tələbidir. Avropa İqtisadi Komissiyasının təsnifatı üzrə sərnişin-minik maşınlarının siyahısına uyğun qərar verilib. Ya icazə verilən avtomobilləri kreditlə götürün, ya da taksi şirkətlərində sürücü kimi çalışın”.

Sonda sürücülər təkliflərinə Nəqliyyat Nazirliyi rəhbərliyinin rəsmi münasibətini öyrənmək üçün bir-iki gün gözləyəcəklərini bəyan ediblər. Görüş elə bu razılaşma ilə də başa çatıb.

Qeyd edək ki, yanvarın 13-dən Nəqliyyat Nazirliyi ilə Daxili İşlər Nazirliyi reydlərə başlayıb. Onlar lisenziyasız işləyən, həmçinin sovet istehsalı olan avtomobillərin taksi kimi xidmətlərinə qadağa qoyur. Taksi fəaliyyəti ilə məşğul olmaq istəyənlərin avtomobillərinin buraxılış ili 2007-ci ildən sonrakı dövrə aid olmalıdır.