İnfrastruktur

Ana səhifə

İnfrastruktur

“Flydubai” aviaşirkəti Dubay-Bəsrə aviareysi açır

02 iyul 2012 09:28 (UTC +04:00)

Bakı - APA-Economics. Dubayın “Flydubai” aviaşirkəti marşrut xəritəsinə daha bir şəhəri əlavə edib. Şirkətdən “APA-Economics”ə verilən məlumata görə, bu il avqustun 8-dən etibarən aviaşirkət həftədə dörd dəfə Bəsrə şəhərinə uçuşlar həyata keçirəcək.
Bağdad, Nəcəf, Süleymaniyyə və Ərbildən sonra Bəsrə “Flydubai” aviaşirkətinin marşrut xəritəsində beşinci İraq şəhəri olacaq. Hazırda “Flydubai” İraqa marşrutların sayına görə regionda ilk yeri tutur. 2011-ci ilin yekunlarına görə, Birləşmiş Ərəb Əmirlikləri və İraq arasında ticarət dövriyyəsi 4,5 mlrd. ABŞ dollarından artıq olub.
“2010-cu ildə Ərbil və Süleymaniyyə şəhərlərinə uçuşlara başlamaqla nümayiş etdirdik ki, yerli bazar bizim üçün mühüm əhəmiyyət kəsb edir. Yeni istiqamətlərin açılması, hava yolu çatışmazlığı ilə üzləşən, lakin inkişafda olan regionların aşkarlanmasına yönələn strategiyamızın davamıdır. Ümid edirik ki, marşrut şəbəkəmizin inkişafı BƏƏ və İraq arasında sərnişin axınının bundan sonra da genişlənməsinə səbəb olacaq, işgüzar aləmə və Əmirliklərdə yaşayan minlərlə iraqlılara fayda verəcək”, - deyə “Flydubai” aviaşirkətinin prezidenti Qeyt əl-Qeyt bildirib.
“Flydubai” aviaşirkətinin biznes-modeli qənaətcil qiymətlər üzərində qurulub. Sərnişin məhz ona lazım olan xidmətlərdən istifadə edir. Sərnişinlər təyyarənin salonunda 3 ABŞ dollarından başlayan əlavə əyləncə paketlərini seçə, sərinləşdirici içkilər, gömrük rüsumlarından azad mağazadan müxtəlif mallar sifariş edə bilərlər. Dubay-Bəsrə aviareysinə gediş-dönüş qiyməti 600 ABŞ dollarından başlayır. Aviaşirkətin tariflərinə, vergi və rüsumlar daxil olmaqla, çəkisi 7 kq-a qədər olan əl yükü, 1 kiçik çanta və yaxud 1 noutbuk (çexolda) daxildir. 20 kq baqaj yükünün daşınma qiyməti 14 ABŞ dollarından başlayır, ayaqlar üçün geniş sahəsi olan yerlərdə oturmaq üçün əlavə olaraq 28 ABŞ dolları ödəmək lazımdır.
Aviareyslərə biletləri “Flydubai” aviaşirkətinin saytı vasitəsilə (www.flydubai.com), telefonla Dubayda (+9714 231 1000) və yaxud turizm şirkətlərindən əldə etmək olar.