İnfrastruktur

Ana səhifə

İnfrastruktur

“Yahoo!”nun yeni baş direktoru payızda ana olacaq

18 iyul 2012 10:17 (UTC +04:00)

Bakı - APA-Economics. “Yahoo!” korporasiyasının yeni baş direktoru Marissa Mayer ana olmağa hazırlaşır. “APA-Economics”in xəbərinə görə, bu barədə o, “Fortune” jurnalına müsahibəsində bildirib.

M.Mayer vəkillik fəaliyyəti ilə məşğul olan həyat yoldaşı Zaxari Boqla birlikdə oktyabrın 7-də oğlan övladlarının dünyaya gəlişini gözlədiyini söyləyib: “Hamilə olmağım barədə korporasiyanın direktorlarına məlumat vermişəm. Amma onlardan heç biri mənim bu posta təyinatıma etiraz etmədi”.

Qeyd edək ki, 37 yaşlı M.Mayer iyulun 17-də “Yahoo!” internet korporasiyasının rəhbəri təyin olunub. Bu vəzifə bu il mayın 13-dən – sabiq baş direktor Skott Tompsonun istefasından sonra boş qalıb. İstefaya səbəb onun şəxsi məlumatlarında özünü kompyuter texnologiyaları sahəsində alim kimi təqdim etməsi olub. Alim olmadığı üzə çıxandan sonra S.Tompson istefaya getmək məcburiyyətində qalıb.

Əsası 1994-cü ildə qoyulan “Yahoo!” şirkətinin mənzil-qərargahı ABŞ-ın Kaliforniya ştatının Sanniveyl şəhərində yerləşir. Populyar axtarış sisteminə malik şirkət internet-xidmətlərin geniş spektrini təqdim edir ki, bunları da 500 mln. nəfərdən artıq istifadəçi ziyarət edir. “Yahoo!”nun hazırda 13,7 min əməkdaşı var.