İnfrastruktur

Ana səhifə

İnfrastruktur

Rabitə İşçiləri Müstəqil Həmkarlar İttifaqı Respublika Komitəsinin hesabat-seçki konfransı keçirilib

25 iyul 2012 08:16 (UTC +04:00)

Bakı. Nicat Mustafayev - APA-Economics. Rabitə İşçiləri Müstəqil Həmkarlar İttifaqı Respublika Komitəsinin (RİMHİRK) hesabat-seçki konfransı keçirilib.

Azərbaycan Rabitə və İnformasiya Texnologiyaları Nazirliyindən «APA-Economics»ə verilən məlumata görə, konfransda rabitə və informasiya texnologiyaları nazirinin müavini İltimas Məmmədov, Azərbaycan Həmkarlar İttifaqları Konfederasiyasının rəhbərliyi, rabitə birlik və müəssisələrinin həmkarlar ittifaqlarının sədrləri iştirak edib.

Toplantını giriş sözü ilə RİMHİRK-nin sədri Seymur Orucov açaraq konfransın gündəliyi ilə mərasim iştirakçılarını tanış edib. Gündəlikdə Respublika Komitəsinin Rabitə İşçiləri Müstəqil Həmkarlar İttifaqının IV (XXIV) konfransından sonrakı dövr ərzindəki görülən işlər, Təftiş Komissiyasının hesabatı, RİMHİRK-in fəaliyyətinin əsas istiqamətləri, proqramının qəbul edilməsi, sədr, sədr müavini və Təftiş Komissiyasının seçilməsi olub.

Hesabatla çıxış edən S.Orucov bildirib ki, IV (XXIV) Respublika Konfransından keçən dövr ərzində respublikanın həmkarlar təşkilatlarında böyük dəyişikliklər baş verib, qanunvericilik bazası möhkəmləndirilib və həmkarlar təşkilatlarının fəaliyyəti üçün geniş imkanlar yaradılıb. Bu dövr ərzində ölkə iqtisadi cəhətdən daha da dinamik inkişaf edib, əhalinin, o cümlədən rabitəçilərin sosial-iqtisadi vəziyyəti xeyli yaxşılaşıb: «Rabitə İşçiləri Müstəqil Həmkarlar İttifaqının hesabat dövrü 2006-cı ilin martın 10-dan bu günədək olan dövrü əhatə edir. RİMHİRK Azərbaycanda rabitə və informasiya texnologiyaları sahəsində fəaliyyət göstərən dövlət və özəl müəssisələrlə əməkdaşlıq münasibətlərini müxtəlif istiqamətlərdə inkişaf etdirməkdədir. Hesabat dövrü rabitə və informasiya texnologiyaları sahəsinə daxil olan «Catel» MMC-də, «Kür EAİ» MMC-də, «Fəriba» MMC-də, «Azərkosmos» MMC-də və «Rabitə Mülki Tikinti» MMC-də ilk həmkarlar təşkilatları yaradılıb».

S.Orucov bildirib ki, RİMHİRK-ın balansında olan «Nabran» istirahət bazası 2011-ci ildə əsaslı təmir edilib. Baza həmkarlar ittifaqı üzvlərinin ailələri ilə birlikdə sağlamlıqlarını bərpa etmək, onların mənəvi istirahətlərini təmin etmək üçün fəaliyyət göstərir: «Hesabat dövründə 5 plenum keçirilib. Plenumlarda «Müasir mərhələdə əməyin mühafizəsi problemlərinin həllində Həmkarlar İttifaqının rolu», «Rabitə müəssisələrində kollektiv müqavilələrin yerinə yetirilməsinin vəziyyəti», «Əmək qanunvericiliyinə əməl edilməsi və kollektiv müqavilələrin yerinə yetirilməsinin vəziyyəti» müzakirə edilib və müvafiq qərarlar qəbul edilib».

Bundan başqa, AHİK-in tədris planına uyğun olaraq RİMHİRK-ın tərtib etdiyi tədris planı üzrə Həmkarlar İttifaqı kadrlarının və fəallarının təhsil və ixtisaslarının artırılması təşkil edilib və hesabat dövrü ərzində 354 nəfər öz təhsilini və ixtisasını artırıb. Hesabat dövründə Respublika Komitəsinə rabitəçilər tərəfindən 5 137 ərizə, məktub və şikayət daxil olub: «Həmkarlar İttifaqı təşkilatının Rabitə və İnformasiya Texnologiyaları Nazirliyi və onun tabe müəssisələrinin rəhbərləri ilə qarşılıqlı birgə fəaliyyətinin nəticəsində daxil olmuş ərizə və şikayətlərin əksəriyyəti tez bir zamanda aradan qaldırılıb, işçilərin pozulmuş hüquqları bərpa olunub. İşğal olunmuş rayonlardan qaçqın düşmüş rabitəçilər, onların ailələri, Qarabağ müharibəsi əlilləri və şəhid ailələri, 20 Yanvar rabitəçi şəhid ailələri, Çernobıl iştirakçıları, rabitəçi ahıllar daim diqqət mərkəzindədir. Onların problemləri vaxtında həll olunur, maddi yardımlar verilir, pulsuz yollayışlarla təmin olunur».

Bununla yanaşı, S.Orucov qeyd edib ki, nazir Əli Abbasovun birbaşa nəzarəti ilə hər il Rabitə və İnformasiya Texnologiyaları Nazirliyi ilə RİMHİRK arasında «Erməni təcavüzü nəticəsində işğal olunmuş rayonların qaçqın düşmüş rabitəçiləri ilə keçiriləcək görüşlər və başqa tədbirlər» haqqında birgə qrafik hazırlanır: «Bu tədbirlər planında keçiriləcək görüşlərin adı, keçirilmə tarixi, yeri, icraçı təşkilat və görüşdə iştirak edəcək rəhbər şəxslər dəqiq müəyyən edilir».

Daha sonra Təftiş Komissiyasının hesabatı və Mandat Komissiyasının açıqlaması dinlənilib. Sonra açıq səsvermə ilə S.Orucov RİMHİRK-nin sədri, Rəşad Səfərov isə sədr müavini seçilib və daha sonra komitənin Rəyasət heyətinin üzvləri təsdiq olunub.