İnfrastruktur

Ana səhifə

İnfrastruktur

“Bakcell” Milli Təhlükəsizlik Nazirliyinin keçirdiyi əməliyyatla bağlı məlumat yayıb

01 avqust 2012 15:06 (UTC +04:00)

Şirkətdən «APA-Economics»ə verilən məlumata görə, «Bakcell»in dələduzluğa qarşı mübarizə şöbəsi tərəfindən «KeyNote SİGOS» və «Austria Telekom» şirkətlərinin sınaq proqramlarından, GSM kanalpaylayıcıları və digər texniki avadanlıqlardan (SİM Box) istifadə halları araşdırılıb. Xüsusi proqram təminatı sayəsində «Bakcell» səs trafikinin sonlandırılması üçün şirkətin SİM kartlarından istifadə edən cihazlar aşkar edib. Şirkət müvafiq strukturları bu barədə məlumatlandırıb və «Bakcell» şəbəkəsindən istifadə etməklə qanunsuz sahibkarlıq fəaliyyəti ilə məşğul olan cinayətkarları həbs edən nazirliklə fəal şəkildə əməkdaşlıq edib.

«Bakcell»in baş direktoru Riçard Şirer bildirib ki, “SİM Box” dələduzluğu bütün dünyada mobil operatorların gəlirləri üçün ciddi təhlükə yaradır: “Bu cür dələduzluq fəaliyyətləri nəticəsində hökumətlər və operatorlar böyük məbləğlərdə gəlir itkisinə məruz qalırlar. Qanunsuz zənglərin qarşısını almaq məqsədilə şirkətimizdə “SİM Box” aşkarlama (SİM Box detection) sistemi istifadə olunur. Biz bu cür texnologiyaların cinayətkarlar tərəfindən istifadə edildiyindən xəbərdarıq və onların saxlanılması və qanunla cəzalandırılması üçün Nazirliyə tələb olunan dəstək göstərib gələcəkdə də fəal aşkarlama və araşdırma tədbirlərini həyata keçirəcəyik. Şirkətimiz bu cür halların qarşısının alınması üçün bütün lazımi və müasir texnologiyalara malikdir”.

«Qeyd edək ki, müəyyən şəxslər və ya qruplar müxtəlif cihaz və SİM kartlarından istifadə edərək istənilən mobil operatorun şəbəkəsindən qanunsuz beynəlxalq zənglər təşkil etməkdədir. Həmin zənglər mobil operatorun şəbəkəsində yerli zəng kimi qeydiyyata alınır və beynəlxalq zənglərə aid böyük məbləğlərdə gəlir itkilərinə səbəb olur» - deyə məlumatda bildirilir.