İnfrastruktur

Ana səhifə

İnfrastruktur

Azərbaycan İqtisadi İnkişaf Nazirliyi elektron xidmətlərinin təqdimatını keçirib

06 avqust 2012 12:33 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İqtisadi İnkişaf Nazirliyinin göstərdiyi elektron xidmətlərin təqdimatı keçirilib.

«APA-Economics»in məlumatına görə, tədbirdə çıxış edən iqtisadi inkişaf nazirinin müavini Niyazi Səfərov son illər ərzində ölkədə bir sıra sahələrdə aparılan islahatlardan danışıb və bildirib ki, bu islahatlar nəticəsində Azərbaycanın neft və qeyri-neft sektoru dinamik inkişaf edib.

Ölkədə iqtisadiyyatın bütün sahələrində yeni və qabaqcıl informasiya texnologiyalarının tətbiqinə böyük önəm verildiyini bildirən nazir müavini onu da qeyd edib ki, elektron xidmətlərin tətbiqi modern və çevik idarəetmənin təmin edilməsi, şəffaflığın daha da artırılması, sahibkarlarla birbaşa təmasın minimuma endirilməsi baxımından xüsusi əhəmiyyət kəsb edir, işin səmərəli təşkilinə, vaxt itkisinin qarşısının alınmasına imkan verir: «Nazirliyin rəsmi internet səhifəsində elektron xidmətlər bölməsi yaradılıb ki, bu bölmədə nazirlik tərəfindən müxtəlif fəaliyyət növlərinə verilən lisenziyalar və sertifikatlar, bu xidmətlərin göstərilməsi üçün tələb olunan sənədlərin siyahısı və müraciət edən şəxs tərəfindən doldurulmalı olan ərizə və digər sənədlərin elektron forması yerləşdirilib. Ümumilikdə nazirlik tərəfindən elektron xidmətlər bölməsində 7 istiqamətdə interaktiv və 9 istiqamətdə informativ elektron xidmətlər göstərilir».

N.Səfərov onu da qeyd edib ki, İqtisadi İnkişaf Nazirliyi tərəfindən göstərilən elektron xidmətlər üzrə qanunvericiliklə müəyyən olunmuş bütün dövlət rüsumları və xidmət haqlarının sahibkarlıq subyektləri tərəfindən elektron qaydada ödənilməsi məqsədilə həm real vaxt rejimində elektron (on-line), həm də ödənişə dair təsdiqedici sənədlərin elektron müraciətə əlavə edilməklə həyata keçirməsi təmin olunub.

«Vətəndaşların və sahibkarlıq subyektlərinin ehtiyacları öyrənilərək İqtisadi İnkişaf Nazirliyinin elektron informasiya resursları vasitəsilə əlavə olaraq vətəndaşların on-line rejimində qəbula yazılmaları, onların müraciətlərinin on-line qaydada qəbulu və cavablandırılması, vətəndaşların nazirliyin məsul işçiləri ilə canlı video əlaqəsi, vətəndaşlarla on-line rejimində sual-cavab və ən çox verilən suallar sistemi, dövlət proqramlarının icrası barədə rəqəmsal xəritə, on-line rejimdə video-təlim sistemi, icazələrin elektron informasiya portalı, elektron ticarət portalı və s. elektron xidmətlər təşkil olunub», - deyə N.Səfərov bildirib.

Sonra bir şirkətə malın mənşə sertifikatının, başqa bir şirkətə isə əlvan metal, tərkibində qiymətli metallar və daşlar olan sənaye və istehsal tullantılarının tədarükü, emalı və satışı üzrə lisenziyanın verilməsi əyani şəkildə nümayiş etdirilib, tədbir iştirakçılarını maraqlandıran suallar cavablandırılıb.

Tədbirdə Vergilər, Rabitə və İnformasiya Texnologiyaları, Kənd Təsərrüfatı, Maliyyə, Sənaye və Energetika, Nəqliyyat, Ekologiya və Təbii Sərvətlər nazirlikləri, Dövlət Gömrük Komitəsi və Mərkəzi Bank, eləcə də ABŞ-ın Beynəlxalq İnkişaf Agentliyi (USAID), Türk Əməkdaşlıq və İnkişaf İdarəsi (TIKA), Koreya Beynəlxalq Əməkdaşlıq Agentliyi (KOICA), Almaniya Beynəlxalq Əməkdaşlıq Cəmiyyətinin (GIZ), Beynəlxalq Valyuta Fondu (IMF), Dünya Bankının nümayəndələri və sahibkarlar iştirak ediblər.