Maliyyə

Ana səhifə

Maliyyə

Azərbaycan Milli Bankının notlar üzrə gəlirlik səviyyəsini azaltmaq cəhdi uğursuz alınıb

04 sentyabr 2008 16:05 (UTC +04:00)

Bakı. Vahab Rzayev – APA-Economics. Bakı Fond Birjasının (BFB) ticarət seksiyasında Azərbaycan Milli Bankının (AMB) notlarının yerləşdirilməsi üzrə bu gün keçirilən hərrac baş tutsa da, yerləşdirmənin həcmi aşağı səviyyədə olub.
BFB-dan «APA-Economics»ə verilən məlumatına görə, yerləşdirmənin həcmi nominal üzrə 504 min manat təşkil edib. Hərraca 1 investor tərəfindən həmin məbləğdə sifariş təqdim olunub. Hərrac nəticəsində müəyyən edilmiş ortaölçülmüş qiymət 92,12% təşkil edib, bu da 11,02% səviyyəsində illik gəlirlik deməkdir.
Müşahidəçilər qeyd edirlər ki, milli fond bazarının inkişafı tarixi ərzində ilk dəfə olaraq, bu hərracda AMB emissiyanın həcmini əvvəlcədən elan etməyib. Bunun əvəzində mərkəzi bank notların satışı üzrə qiymət səviyyəsini müəyyənləşdirib. Lakin son nəticədə AMB-nin elan edilən gəlirlik investorları qane etməyib.
Xatırladaq ki, son yerləşdirmədə 11,41% səviyyəsində gəlirlik müşahidə edilib və bu dəfə AMB gəlirliyin azaldılmasına cəhd göstərib.
Qeyd edək ki, hazırkı konyunkturu, yəni inflyasiya, manatın zəifləməsi, cəlb olunan depozitlər üzrə faiz dərəcələrinin artması və s. bu kimi amillər nəzərə alındıqda, notların banklar üçün sərmayə aləti kimi cəlbediciliyi şübhə altına düşür. Digər tərəfdən isə, Milli Bank üçün də notlar vasitəsi ilə pul kütləsinin azaldılmasının zəruriliyi şübhə doğurur. Çünki hazırkı vəziyyətdə sterilizasiyanın yeganə məqsədi inflyasiyanın monetar amillərinin azaldılmasıdır ki, bunlar da indiki mərhələdə inflyasiyanın formalaşmasında heç bir rol oynamır.