Maliyyə

Ana səhifə

Maliyyə

AZEL şirkəti «Naxçıvanbank»da «Proqress» proqram təminatını quraşdıracaq

08 sentyabr 2008 11:42 (UTC +04:00)

Bakı. Vüqar Mustafayev – APA-Economics. AZEL şirkəti («Azərbaycan Elektronikası») tərtib etdiyi «Proqress» proqram təminatının tətbiqinə dair «Naxçıvanbank» ASC ilə müqavilə imzalayıb.
AZEL-dən «APA-Economics»ə verilən məlumata görə, hazırda şirkətin mütəxəssisləri bankda yeni sistemin tətbiqi üçün işlər aparırlar. Son illərdə AZEL-in «Proqress» bank proqram təminatı ölkədə fəaliyyət göstərən bank təşkilatlarında ciddi maraq oyadıb. Bu sistem artıq «Bank Avrasiya», «Royal Bank of Baku», «Eurobank», «Azərbaycan Kredit Bankı», «Gəncəbank, «Debüt Bank», «Atra Bank», «Muğan Bank», «Parabank» və s. quraşdırılıb. «Proqress» proqram təminatı «Oracle»ın platforması əsasında qurulub. Sistem milli tələblərə uyğun maliyyə və mühasibat hesablamalarının aparmasına imkan verir.
Qeyd edək ki, ötən ay Azərbaycan Milli Bankı mərkəzi ofisi Naxçıvan şəhərində yerləşən «Naxçıvanbank» ASC-yə bank lisenziyası verib.
Xatırladaq ki, «Naxçıvanbank» bu ilin may ayında Vergilər Nazirliyi tərəfindən qeydiyyata alınıb. Yeni kommersiya bankının nizamnamə kapitalı 10 mln. manat, səhmlərin ümumi sayı 1 mln. ədəd, bir səhmin nominal dəyəri isə 10 manat təşkil edir. «Naxçıvanbank» ASC-nin təsisçiləri rolunda 7 fiziki şəxs çıxış edir. Bunlar Talıbov Vüqar İlqar oğlu (100 min səhm, 10%), Sultanova Sevil Rza qızı (100 min səhm, 10%), Abbasov Vüqar Zakir oğlu (300 min səhm, 30%), Emin Uçar Rəsul oğlu (Türkiyə vətəndaşı, 300 min səhm, 30%), Teymurov Vurğun Bəbir oğlu (50 min səhm, 5%), Əliyeva Tünzalə Meydan qızı (50 min səhm, 5%) və Talıbov Rza Vasif oğludur (100 min səhm, 10%). Bankın Müşahidə Şurasının üzvləri kimi Mircavadova Xuraman Abbas qızı, Kazımov Vasif Əli oğlu və Babayev Əlidadaş Adil oğlu qeydiyyata alınıb. «Naxçıvanbank»ın baş ofisi Naxçıvan şəhəri, N. Əliyev küçəsi, 3 ünvanında yerləşir.
Bu, Azərbaycanda baş ofisi bölgədə yerləşən ikinci bank təşkilatıdır (Gəncə şəhərində «Gəncəbank» SKB fəaliyyət göstərir).