Maliyyə

Ana səhifə

Maliyyə

Azərbaycanın bank sektorunda cari likvidlik problemi yaranır

16 sentyabr 2008 08:12 (UTC +04:00)

Bu fikri «APA-Economics»ə açıqlamasında Azərbaycan Milli Bankı (AMB) İdarə heyətinin sədri Elman Rüstəmov söyləyib.
Bu il ərzində mərkəzi bankın qısamüddətli notları bazarının kapitalizasiyasının azalmasını nəzərə alaraq, qeyd etmək olar ki, həm bankların likvidliyi, həm də bu alətə maraq azalıb. E.Rüstəmov vurğulayıb ki, hazırda notlar üzrə gəlirlik aşağı səviyyədədir. Belə ki, notlar üzrə gəlirlik illik 11,02% səviyyəsindədir və bu, kreditlərlə müqayisədə çox aşağı göstəricidir.
Eyni zamanda, ilin əvvəlindən repo əməliyyatları üzrə dövriyyə 3,3 mlrd. manatdan artıqdır. Xatırladaq ki, repo - AMB tərəfindən qiymətli kağızların müvəkkil banka satışı (repo-nun açılması) və eyni zamanda müvəkkil bank tərəfindən həmin kağızları Milli Banka satmaq, AMB-nin isə onları müvəkkil bankdan geri satın almaq öhdəliyini (repo-nun bağlanması) rəsmiləşdirən maliyyə əməliyyatlarıdır. Qeyd edək ki, əks-repo əməliyyatı – müvəkkil bank tərəfindən qiymətli kağızların Milli Banka satışı və eyni zamanda Milli Bank tərəfindən həmin qiymətli kağızları müvəkkil banka satmaq, müvəkkil bankın isə onları Milli Bankdan geri satın almaq öhdəliyini rəsmiləşdirən maliyyə əməliyyatıdır. Beləliklə, repo əməliyyatı bank sisteminin likvidliyinin tənzimləməsi mexanizmidir. Yəni, likvidlik düşəndə mərkəzi bank əks-repo, likvidlik artanda isə repo əməliyyatları keçirir.
Bu il əks-repo əməliyyatları keçirilməyib, yəni AMB repo əməliyyatları keçirərək banklardan artıq likvidliyi alır. Amma buna baxmayaraq, notlar bazarı son 1,5 il ərzində ən aşağı səviyyəyə düşüb. Eyni zamanda qeyd etmək lazımdır ki, aparılan repo əməliyyatları yalnız bir günlük olur, 3 və 7 günlük repo əməliyyatları isə banklar üçün maraq kəsb etmir. Bu da ona dəlalət edir ki, banklar öz likvidlik mövqeyinə yalnız çox qısa bir müddət üçün arxayındır.