Maliyyə

Ana səhifə

Maliyyə

«Aqrarkredit» QSC nizamnamə kapitalını 2 dəfə artırır

17 sentyabr 2008 14:32 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) «Aqrarkredit» Qapalı Səhmdar Cəmiyyətinin (ASC) sənədsiz adlı adi səhmlərinin emissiya prospektini dövlət qeydiyyatına alıb.
QKDK-dan «APA-Economics»ə verilən məlumata görə, səhmlərin hər birinin nominal dəyəri 1 manat, sayı 18 535 425 ədəd, emissiyanın ümumi həcmi isə 18 535 425 manat təşkil edir. Emissiyanın kütləvi təklif üsulu ilə Bakı fond Birjası (BFB) vasitəsilə yerləşdirilməsi planlaşdırılır.
Birja mütəxəssislərinin fikrincə, «Aqrarkredit»in artıq sentyabr ayında səhmlərin yerləşdirilməsinə başlayacağı gözlənilir. Yerləşdirmə uğurla başa çatacağı təqdirdə təşkilatın nizamnamə kapitalı 2 dəfə artaraq 37 070 850 manata çatacaq.
Qeyd edək ki, «Aqrarkredit» qeyri-bank kredit təşkilatı 2001-ci ildən fəaliyyət göstərir. Təşkilatın təsisçisi rolunda Azərbaycan hökuməti çıxış edir. Hazırda «Aqrarkredit»in nizamnamə kapitalı 18 535,4 min manat təşkil edir. Təşkilatın strukturu Bakı şəhərində yerləşən Baş ofisdən və respublikanın bütün inzibati ərazisini əhatə edən 12 filial şəbəkəsindən və 5 nümayəndəlikdən ibarətdir.