Maliyyə

Ana səhifə

Maliyyə

Son 9 ayda Azərbaycanın xarici ölkələrlə ticarət dövriyyəsində 33 197 887,5 min ABŞ dolları müsbət saldo yaranıb

22 sentyabr 2008 09:14 (UTC +04:00)

Bakı. Rəşad Süleymanov – APA-Economics. Cari ilin yanvar-avqust aylarında Azərbaycanın xarici ölkələrlə ticarət dövriyyəsində 33 197 887,5 min ABŞ dolları müsbət saldo yaranıb. Bu barədə «APA-Economics»ə Dövlət Gömrük Komitəsindən (DGK) məlumat verilib.

Yanvar-avqust aylarında 134 ölkə ilə aparılmış ticarət əməliyyatlarının həcmi 42 209 183,8 min dollar, o cümlədən ixrac 37 703 535,6 min dollar, idxal 4 505 648,2 min dollar təşkil edib. Hesabat dövründə ölkəyə 24 040 min dollar dəyərində 3 673,9 ton əmtəə dövlət, hökumət və beynəlxalq təşkilatların xətti ilə təmənnasız kömək, humanitar yük gətirilib.

Ötən ilin müvafiq dövrünə nisbətdə ixrac əməliyyatlarının həcmi 9 dəfədən çox, idxal əməliyyatlarının həcmi isə 31,91% artıb.

Müvəqqəti ixrac rejimində Azərbaycandan 268 349,8 min dollar dəyərində mal ixrac edilib, 306 040,2 min dollar dəyərində mal isə ölkəyə müvəqqəti idxal olunub.

Hesabat dövründə Azərbaycanın ixracının 93,84%-ni xam neft, 3,70%-ni neft məhsuları, 0,26%-ni meyvə-tərəvəz, 0,24%-ni kimya sənayesi məhsulları, 0,23%-ni qara metallar və ondan hazırlanan məmulatlar, 0,22%-ni alüminium və ondan hazırlanan məmulatlar, 0,21%-ni bitki və heyvan mənşəli yağlar və s. idxalın isə 29,84%-ni maşın, elektrik aparatları, elektrotexniki avadanlıqlar, 18,85%-ni nəqliyyat vasitələri və onların hissələri, 12,10%-ni ərzaq məhsulları və s. təşkil edib.

Qeyd edək ki, yanvar-avqust aylarında xarici ticarətlə 7581 hüquqi və fiziki şəxs məşğul olub. İxrac əməliyyatlarında dövlət sektorunun payı 34,55%, özəl sektorun payı 65,22%, fiziki şəxslərin payı isə 0,23%-dir. İdxal əməliyyatlarında isə bu göstərici müvafiq olaraq 22,90%, 71,84% və 5,26% təşkil edib.