Maliyyə

Ana səhifə

Maliyyə

Asiya İnkişaf Bankı Azərbaycanda ümumi dəyəri 3,1 mlrd. dollar olan bir neçə layihənin icrasına qoşulacaq

25 sentyabr 2008 13:07 (UTC +04:00)

Bakı. Nicat Mustafayev – APA-Economics. Növbəti 10 il ərzində Asiya İnkişaf Bankının (AİB) Mərkəzi Asiya Regional İqtisadi Əməkdaşlıq Proqramı (CAREC) çərçivəsində proqrama üzv olan ölkələrdə ümumi həcmi 15,8 mlrd. ABŞ dolları olan 41 yeni investisiya layihəsinin həyata keçirilməsi nəzərdə tutulub.
AİB-in Bakı ofisindən «APA-Economics»ə verilən məlumata görə, ümumiyyətlə üzv ölkələrdə 63 investisiya layihəsi həyata keçiriləcək (41 yeni və 22 hazırda icra olunan). Belə ki, bütün 63 layihənin ümumi dəyəri 21 mlrd. dollar həcmində qiymətləndirilir.
CAREC çərçivəsində Azərbaycanda həyata keçiriləcək investisiya layihələrinin ümumi dəyəri 3,1 mlrd. dollar təşkil edir ki, bunun da 2 mlrd. dolları «Dəmir yolu ticarəti və daşımalara dəstək Layihəsi»nin payına düşür. Bu layihənin I fazasının həyata keçirilməsi üçün nəzərdə tutulan 450 mln. dolları Dünya Bankı tərəfindən Azərbaycana kredit şəklində ayrılması artıq təsdiqlənib. Hazırda növbəti fazaların hazırlanması və onların reallaşdırılması üçün maliyyə vəsaitinin cəlb olunması ilə bağlı hazırlıq işləri aparılır. Həmçinin, bu layihəni AİB və Avropa Yenidənqurma və İnkişaf Bankı (AYİB) da maliyyələşdirə bilər. Bu layihə Şərq-Qərb dəmir yolu xəttinin reabilitasiyası layihəsi çərçivəsində həyata keçiriləcək və artıq bu il ərzində I fazanın icrasına başlanacaq. Hazırda ümumi uzunluğu 2 122 km olan Şərq-Qərb dəmir yolu xətti ilə hərəkət edən yükdaşıma qatarlarının Azərbaycanda orta sürəti 35 km/saat təşkil edir, xəttin 30%-nin reabilitasiya olunmasına ehtiyac duyulur. Layihənin icrası nəticəsində yük qatarlarının sürətinin 80 km/saatadək, sərnişin qatarlarının isə 100 km/saatadək artırılması mümkün olacaq.
Ümumiyyətlə, Azərbaycanda həyata keçiriləcək Dəmir Yolu Ticarəti və Daşımalara Dəstək Layihəsi bir sıra mərhələlərdən ibarət olacaq ki, bura 240 km uzunluğunda dəmir yolu magistralının reabilitasiyası, dəmir yolunun 25 kV elektrik enerjisi ilə təminatı sisteminə keçidi, 50 ədəd yeni elektrovozun alınması və digər məsələlər daxildir.
Qeyd edək ki, ötən il ərzində CAREC üzrə nəqliyyat dəhlizləri 64% yaxşılaşıb, 2012-ci ildə dəhlizlər 75%, 2017-ci ilədək isə 100% yaxşılaşdırılacaq.
Xatırladaq ki, CAREC AİB-in Mərkəzi Asiyada regional əməkdaşlığa dair dəstəklədiyi təşəbbüsdür və onun icrasına 1997-ci ildə başlanılıb. Hazırda bu proqram nəqliyyat, ticarət siyasəti və energetika sahələrini əhatə edir. CAREC Proqramı ilə Beynəlxalq Valyuta Fondu, Dünya Bankı, Avropa Yenidənqurma və İnkişaf Bankı, İslam İnkişaf Bankı və BMT-nin İnkişaf Proqramı sıx əməkdaşlıq edir və bu qurumlar 2006-2008-ci illər ərzində energetika, nəqliyyat və ticarət sahələrində həyata keçirilən investisiya layihələrinin icrasına 2,3 mlrd. dollar kredit ayırmağı planlaşdırır.