Maliyyə

Ana səhifə

Maliyyə

«United Credit Bank» son bir ildə depozit portfelini 83% genişləndirib

13 oktyabr 2008 13:02 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» Səhmdar Kommersiya Bankının (SKB) aktivlərinin həcmi bu ilin oktyabr ayının 1-nə 33,514 mln. manat təşkil edib ki, bu da 2007-ci ilin analoji dövrü ilə müqayisədə 59% çoxdur.
Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat dövründə bankın depozit portfeli 84,3% genişlənərək 8,675 mln. manata, kredit portfeli 36% artaraq 22,167 mln. manata, o cümlədən istehlak kreditlərinin həcmi 5,4% artaraq 8,806 mln. manata çatıb.
Həmçinin, bankın məcmu kapitalı 5% artaraq 13,428 mln. manat, o cümlədən nizamnamə kapitalı sabit qalaraq 12,108 mln. manat təşkil edib.
Qeyd edək ki, bu ilin yanvar-sentyabr aylarında bankın gəlirləri 47,3% artaraq 3,551 mln. manat, xərcləri isə 30,3% artaraq 3,377 mln. manat olub. Bank ötən ilin yanvar-sentyabr aylarını 182 min manat zərərlə başa vurduğu halda, cari ilin analoji dövründə 173 min manat mənfəət əldə edib.
Hesabat dövründə bankın işçilərinin sayı 12,2% azalaraq 79 nəfər, orta aylıq əmək haqqı isə 50% artaraq 753 manat olub. Bundan başqa, bank son bir ildə dövlət büdcəsinə ödədiyi vəsaitlərin həcmini 92,5% artıraraq 100,3 min manata çatdırıb.
Təsisçisi 1 hüquqi və 2 fiziki yerli şəxs olan «United Credit Bank» SKB 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Hazırda bakın respublika üzrə 5 filialı, 4 bankomatı və 4 POS-terminalı fəaliyyət göstərir.