Maliyyə

Ana səhifə

Maliyyə

Azərbaycanın «BE&G» sığorta şirkəti nizamnamə kapitalını 50% artırır

17 oktyabr 2008 09:02 (UTC +04:00)

Bakı. Vüqar Mustafayev – APA-Economics. Azərbaycan Qiymətli Kağızlar üzrə Dövlət Komitəsi yerli «Benefit & Guaranty» (BE&G) sığorta şirkətinin adi adlı sənədsiz səhmlərinin emissiya prospektini dövlət qeydiyyatına alıb.
Emissiyanın ümumi həcmi 400 min manat, bir səhmin nominal dəyəri 5 min manat, buraxılmış səhmlərin sayı 80 ədəd təşkil edir. Emissiya prospektinə əsasən, yerləşdirmə kütləvi təklif üsulu ilə Bakı Fond Birjası (BFB) vasitəsi ilə keçiriləcək. Səhmlərin yerləşdirilməsində anderrayter rolunda «AzerInterTrade» şirkəti çıxış edəcək. Səhmləri əldə etmək istəyən potensial investorlar BFB-nın üzvü olan və broker lisenziyasına malik olan təşkilata müraciət etməlidir.
BFB mütəxəssislərinin fikrincə, sığorta şirkətinin artıq oktyabr ayında səhmlərin yerləşdirilməsinə başlayacağı gözlənilir. Emissiyanın yerləşdirilməsi uğurla başa çatacağı təqdirdə şirkətin nizamnamə kapitalı 50% artaraq 1,2 mln. manata çatacaq.
Xatırladaq ki, bu yaxınlarda «Azər-Asiya» Azərbaycan-İran sığorta şirkəti fəaliyyətini dayandırdığına görə mövcud sığorta portfelini tam həcmdə «BE&G» sığorta şirkətinə satıb. Bu proses «Azər-Asiya»nın İdarə Heyətinin qərarı ilə həyata keçirilib. Qeyd edək ki, portfelin birinci hissəsi «BE&G» sığorta şirkətinə bu ilin avqust ayının 11-də satılıb.
Qeyd edək ki, bu ilin fevral ayının 11-də Maliyyə Nazirliyi «Azər-Asiya» sığorta şirkətinin lisenziyasının müddətinin uzadılmasından imtina edib. Şirkətin lisenziyasının dayandırılmasına əsas səbəb nazirlik tərəfindən aparılan yoxlamalar zamanı şirkətin sığorta qanunvericiliyinə əməl etməməsi və lisenziyanın tələblərinə və şərtlərinə uyğunsuzluğu olub. Təsisçisi İranın «Asiya Sığorta» (49%) və «Azərsığorta» Dövlət Sığorta Kommersiya Şirkəti (51%) olan «Azər-Asiya» şirkəti 1997-ci ildən fəaliyyət göstərib. Cari ilin yanvar ayının 1-nə şirkətin nizamnamə kapitalı 800 min manat təşkil edib. Şirkət 7 könüllü və 2 icbari sığorta növü üzrə xidmət göstərib.
Təsisçisi iki fiziki şəxs olan «BE&G» sığorta şirkəti isə 1998-ci ildə «Naxçıvan» şirkəti kimi fəaliyyətə başlayıb və 2001-ci ildə brendini dəyişib. Şirkətin nizamnamə kapitalı 800 min manata bərabərdir. Hazırda şirkət 23 könüllü və 4 icbari sığorta növü üzrə xidmət göstərir.