Maliyyə

Ana səhifə

Maliyyə

«Bank Standard» SKB «GəncKart» sahibləri üçün uduş aksiyası keçirir

05 noyabr 2008 13:12 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» Səhmdar Kommersiya Bankı (SKB) «GəncKart» sahibləri üçün 2008-ci il modeli olan «Volkswagen Jetta» avtomobili qazanmaq şansı verən yeni aksiyaya start verib.
Bankın baş ofisindən «APA-Economics»ə verilən məlumata görə, bu ilin dekabr ayının 15-dək əldə edilən və həmin tarixədək aktiv olan bütün «GəncKart» sahibləri cari ilin dekabr ayının 20-də keçiriləcək lotereya tirajında iştirak edəcəklər. Hər kart öz sahibinə bir lotereya şansı verir.
«Bank Standard»ın İdarə Heyəti tərəfindən təsdiqlənən iştirakçı siyahısı bu ilin dekabr ayının 18-də bankın www.bankstandard.com saytında yerləşdiriləcək. Siyahıda «GəncKart»ların nömrələri və onlara şamil edilmiş sıra nömrələri (lotereya şanslarının nömrələri) göstəriləcək. Bank əmanətlərinin sirrinin qorunması məqsədilə kart sahiblərinin adları bu siyahıda göstərilmir. Siyahı ilə tanış olmaq üçün bilavasitə bankın filiallarına da müraciət etmək olar.
Xatırladaq ki, yaşı 18-35 arasında olan hər bir kəs «GəncKart» sahibi ola bilər. Kartın illik xidmət haqqı 10 manatdır (dollar). Lakin kart hesabına 200 manat və ya dollardan artıq ilkin məbləğ yatıran müştərilər bu məbləği ödəməkdən azad olunur.
Qeyd edək ki, «AB Standard» Şirkətlər Qrupuna daxil olan «Bank Standard» SKB 1995-ci ildən fəaliyyət göstərir. Cari ilin oktyabr ayının 1-nə bankın aktivlərinin həcmi 660,816 mln. manat, kredit portfeli 441,570 mln. manat, depozit portfeli 173,036 mln. manat, məcmu kapitalı 85,914 mln. manat, o cümlədən nizamnamə kapitalı 50 mln. manat təşkil edib.