Maliyyə

Ana səhifə

Maliyyə

Azərbaycan gələn il dövlət büdcəsinin sosial müdafiə xərclərini 39% artıracaq

07 noyabr 2008 07:38 (UTC +04:00)

Bakı. İlhamə İsabalayeva – APA-Economics. Azərbaycanın 2009-cu il dövlət büdcəsinin layihəsində sosial müdafiə və sosial təminat xərcləri üçün 1 134,4 mln. manat nəzərdə tutulub ki, bu da 2008-ci ilə nisbətən 320,2 mln. manat və ya 39,3% çoxdur.
Nazirlər Kabinetindən «APA-Economics»ə verilən məlumata görə, ayrılan vəsaitin dövlət büdcəsi xərclərinin tərkibində xüsusi çəkisi 9,2%-ə çatacaq ki, bu da 2008-ci illə müqayisədə 1,8 faiz bəndi çoxdur.
Sosial müdafiə və sosial təminat xərclərinə ayrılan vəsaitin 495 mln. manatı Dövlət Sosial Müdafiə Fondu vasitəsilə 2008-ci ildə tətbiq edilmiş artımlar da nəzərə alınmaqla, 2009-cu ildə əmək pensiyalarının baza hissəsinin maliyyələşdirilməsinə (2008-ci ilə nisbətən 28,6% çox), 366,5 mln. manatı Əmək və Əhalinin Sosial Müdafiəsi Nazirliyi vasitəsilə həyata keçirilən sosial xərclərin, o cümlədən ünvanlı dövlət sosial yardımın ödənilməsinə və digər tədbirlərin maliyyələşdirilməsinə (64,7% çox), 199,6 mln. manatı qaçqınların və məcburi köçkünlərin sosial müdafiəsinin təmin edilməsi tədbirlərinin maliyyələşdirilməsinə (24,6% çox) ayrılıb.
Bununla yanaşı, «Əmək pensiyaları haqqında» qanuna uyğun olaraq, əmək pensiyasının sığorta hissəsinin və fərdi hesabın sığorta hissəsində toplanan pensiya kapitalının ildə bir dəfədən az olmamaqla, istehlak qiymətləri indeksinin illik səviyyəsinə uyğun indeksləşdirilməsi məqsədilə dövlət büdcəsində müvafiq məbləğdə vəsait nəzərdə tutulub.
Ailə, uşaq və qadın hüquqlarının müdafiəsi və gender siyasətinin həyata keçirilməsi, məişət zorakılığının qarşısına yönəldilən tədbirlərin, valideyn himayəsindən məhrum olmuş uşaqların ailələrə verilməsi, xüsusi qayğıya ehtiyacı olan uşaqlar üçün alternativ qayğı mərkəzinin yaradılması və s. kimi vəzifələrin icrasının təmin edilməsi məqsədilə Ailə, Qadın və Uşaq Problemləri üzrə Dövlət Komitəsi üçün 628,5 min manat vəsait nəzərdə tutulub ki, bu da 2008-ci illə müqayisədə 3,5 dəfə çoxdur.