Maliyyə

Ana səhifə

Maliyyə

Asiya İnkişaf Bankı ilə Azərbaycan hökuməti arasında iki kredit saziş imzalanacaq

07 noyabr 2008 09:02 (UTC +04:00)

«Noyabrın 19-21-də AİB-in prezidenti Haruhiko Kurodanın Azərbaycana səfəri çərçivəsində AİB ilə Azərbaycan arasında «Elektrik enerjisinin ötürülməsi sisteminin yaxşılaşdırılması Layihəsi», habelə Gəncə dairəvi avtomobil yolunun tikintisi üçün əlavə vəsaitin ayrılmasına dair iki sazişin imzalanması gözlənilir», - deyə AİB-in Bakı ofisindən bildirilib.
Qeyd edək ki, bu ilin sentyabr ayında AİB-in Direktorlar Şurası Azərbaycanda həyata keçiriləcək «Elektrik enerjisinin ötürülməsi sisteminin yaxşılaşdırılması Layihəsi» üçün 160 mln. ABŞ dolları məbləğində kreditin ayrılmasını təsdiqləyib.
Gəncə dairəvi avtomobil yolunun tikintisinin maliyyələşdirilməsinə dair sazişə isə hazırda Nazirlər Kabinetində baxılır. AİB-in Direktorlar Şurası layihənin icrası üçün 55,4 mln. dollar məbləğində kreditin ayrılmasını təsdiqləyib. Dairəvi yolun tikintisi isə 73,9 mln. dollar məbləğində qiymətləndirilir ki, çatmayan 18,5 mln. dolları Azərbaycan hökuməti ayıracaq.
Xatırladaq ki, H.Kuroda noyabrın 19-da Bakıda keçiriləcək Bankın Mərkəzi Asiya Regional İqtisadi Əməkdaşlıq Proqramı (CAREC) üzrə iştirakçı ölkələrin rəsmi şəxslərin iclası və noyabrın 21-də keçiriləcək CAREC üzrə VII Nazirlər Konfransında iştirak edəcək.
CAREC Proqramının üzv ölkələrinin Nazirlər Konfransında Azərbaycan, Çin, Qazaxıstan, Qırğızıstan, Monqolustan, Tacikistan, Özbəkistan, Əfqanıstan və digər ölkələrdən təxminən 140-a yaxın nümayəndə iştirak edəcək.