Maliyyə

Ana səhifə

Maliyyə

Azərbaycan Dövlət Sosial Müdafiə Fondunun gələn ilki büdcəsinin 17% genişlənəcəyi gözlənilir

07 noyabr 2008 15:15 (UTC +04:00)

Bakı. Rəşad Süleymanov – APA-Economics. Azərbaycan Milli Məclisinin iqtisadi siyasət, sosial siyasət və insan hüquqları daimi komissiyalarının bu gün keçirilən birgə iclasında «Dövlət Sosial Müdafiə Fondunun (DSMF) 2009-cu il büdcəsi haqqında» qanun layihəsi müzakirə olunub. «APA-Economics»in məlumatına görə, büdcə layihəsi barədə məlumat verən DSMF-nin sədri vəzifəsini icra edən Səlim Müslümov bildirib ki, gələn il üçün büdcənin gəlir və xərcləri eyni səviyyədə olmaqla 1 775 547 400 manat həcmində proqnozlaşdırılır. Bu isə 2008-ci ilin analoji proqnoz göstəricisi ilə müqayisədə təxminən 17% çoxdur.

S.Müslümov qeyd edib ki, 2008-ci ilin yanvar-oktyabr ayları ərzində DSMF-nin gəlirləri 1,074 mlrd. manat olub ki, bu da 2007-ci ilin müvafiq dövründən 35% çoxdur. Xərcləri isə 1,108 mlrd. manat təşkil edib. Gəlir proqnozu qeyri-büdcə təşkilatlarının məcburi dövlət sosial sığorta haqları üzrə 100,1% icra olunub. Hesabat dövründə məcburi dövlət sosial sığorta haqları üzrə proqnoz 2007-ci ilin müvafiq dövrünə nisbətən 34% artaraq 717 mln. manata çatıb. Sığorta olunanların sayı isə 1,8 mln. nəfəri keçib.

DSMF-nin 2009-cu il büdcəsinin gəlirlərinin 1 278 047 400 manatı məcburi dövlət sosial sığorta haqları (2008-ci illə müqayisədə 23,4% çox), o cümlədən 460 mln. manatı büdcədən maliyyələşən təşkilatlar, 62 727 300 manatı büdcədən maliyyələşən təşkilatlarda işləyənlərdən, 20 mln. manatı dövlət büdcəsindən ayrılan subsidiya hesabına və büdcə təşkilatlarının büdcədənkənar vəsaitləri üzrə daxilolmalar, 735 300 100 manatı digər sığortaedənlər, 2,5 mln. manatı sair gəlirlər, 495 mln. manatı isə dövlət büdcəsindən transfertlər hesabına formalaşacaq. Məcburi dövlət sosial sığorta haqlarının büdcə təşkilatları üzrə artımı 13,9%, qeyri-büdcə təşkilatları üzrə 35,6% təşkil edəcək.

Fondun xərclərinin 1 707 475 000 manatı əhaliyə ödənişlər, o cümlədən 1,660 mlrd. manatı əmək pensiyalarının ödənilməsinə (1,210 mlrd. manatı əmək pensiyalarının baza hissəsi (2008-ci ildən 24,4% çox), 450 mln. manatı sığorta hissəsi), 47,475 mln. manatı məcburi dövlət sosial sığorta haqları hesabına müavinətlərə yönəldiləcək. Sonuncudan 15,020 mln. manatı əmək qabiliyyətinin müvəqqəti itirilməsinə görə, 15,870 mln. manat hamiləliyə və doğuşa görə, 1,390 mln. manatı uşağın anadan olmasına görə, 5 mln. manat 3 yaşına çatanadək uşaqlara qulluqlarla əlaqədar, 9,195 mln. manatı dəfn üçün nəzərdə tutulur. Bundan başqa, pensiya və müavinətlərin əhaliyə çatdırılması, bank əməliyyatlarının aparılması üzrə xidmət haqları xərclərinə 21,2 mln. manat xərclənəcək.

Qanun layihəsi komissiya üzvlərinin müzakirəsindən sonra Milli Məclisin iclasına çıxarılması üçün tövsiyə olunub.