Maliyyə

Ana səhifə

Maliyyə

Azərbaycanda bank kreditlərinin 55%-i milli valyutada ayrılıb

10 noyabr 2008 06:50 (UTC +04:00)

Bakı. Vahab Rzayev – APA-Economics. Cari ilin oktyabr ayının 1-nə Azərbaycanda bank kreditlərinin məcmu həcminin 55,2%-i və ya 3 648,1 mln. manatı milli valyutada verilən kreditlərin payına düşür.
Azərbaycan Milli Bankından (AMB) «APA-Economics»ə verilən məlumata görə, oktyabrın 1-nə bankların ümumi kredit portfelinin həcmi 6 604,7 mln. manat təşkil edib. İl ərzində manatla verilən kreditlərin həcmi 74% artıb və ümumi kredit portfelində xüsusi çəkisi 0,5 faiz bəndi azalıb. Cari ilin əvvəli ilə müqayisədə manat kreditlərinin həcmi 45,1%, xüsusi çəkisi isə 1,5 faiz bəndi artıb.
Manatla verilən kreditlərin həcmində 2 237,9 mln. manat və ya 61,3% uzunmüddətli kreditlərin payına düşür. Eyni zamanda, 2 956,6 mln. manat həcmində olan xarici valyutada verilən kreditlərin 2 327,7 mln. manatı və ya 78,7%-i uzunmüddətli kreditlərdir. Digər tərəfdən qısamüddətli kreditlərin 30,8%-i, uzunmüddətli kreditlərin isə 51%-i xarici valyutada verilib.
AMB-dən həmçinin bildirilib ki, bankların məcmu kredit portfelinin 42,1%-i ölkənin yeganə dövlət bankı olan Azərbaycan Beynəlxalq Bankının payına düşür. Maraqlıdır ki, ölə üzrə ümumilikdə manatla verilən kreditlərin 23,2%-i, xarici valyuta ilə verilən kreditlərin isə 65,3%-i Azərbaycan Beynəlxalq Bankı tərəfindən ayrılıb.