Maliyyə

Ana səhifə

Maliyyə

Azərbaycan parlamenti 2009-cu il dövlət büdcəsi layihəsinin geniş müzakirəsinə başlayıb - YENİLƏNİB

Azərbaycan parlamenti 2009-cu il dövlət büdcəsi layihəsinin geniş müzakirəsinə başlayıb - <font color=red>YENİLƏNİB</font>

11 noyabr 2008 09:27 (UTC +04:00)

«APA-Economics»in məlumatına görə, iclasa sədrlik edən Milli Məclis sədrinin birinci müavini Ziyafət Əsgərov bildirib ki, büdcə layihəsi artıq parlamentin komissiyalarında müzakirə edilib və bəyənilərək müzakirəyə çıxarılması tövsiyə olunub.
Qanun layihəsini Mili Məclisin iqtisadi siyasət daimi komissiyasının sədri Ziyad Səmədzadə təqdim edib. Z.Səmədzadə bildirib ki, 2009-cu ilin büdcəsi təkmil sənəddir və bunun tərtibatı zamanı dünyada baş verən iqtisadi proseslər də nəzərə alınıb. Komissiya sədri həmçinin qeyd edib ki, 2009-cu ildə Vergi Məcəlləsinə dəyişikliklər ediləcək. Belə ki, əlavə dəyər vergisi və mənfəət vergisi üzrə faiz dərəcələri aşağı salınacaq. «Vergi bazasının genişləndirilməsi və büdcə gəlirlərinin artırılması üçün baza mövcuddur. Gömrük sistemində də ciddi, keyfiyyətli dəyişikliklər müşahidə olunur. Nəticədə, büdcə gəlirlərində gömrük rüsumlarının payı artır», - deyə millət vəkili vurğulayıb..
Z.Səmədzadənin sözlərinə görə, növbəti illərdə gömrük rüsumlarının azaldılması üçün müəyyən addımlar atılacaq: «Bu zaman yerli istehsalın stimullaşdırılması, ölkəyə xammal və texnologiyaların gətirilməsi asanlaşdırılacaq».
Komissiya sədrindən sonra toplantıda maliyyə naziri Samir Şərifov çıxış edib.
Xatırladaq ki, gələn il Azərbaycan dövlət büdcəsinin gəlirlərinin ÜDM-nin 27,9%-i həcmində və ya 12 177 mln. manat, xərclərinin isə ÜDM-nin 28,3%-i və ya 12 355 mln. manat olacağı gözlənilir. Bu göstəricilər 2008-ci ilin analoji proqnozlarına nisbətən müvafiq olaraq 16,1% və 1,4% çoxdur.
Qanun layihəsində qarşıdakı il üçün icmal büdcənin gəlirləri 22 680 mln. manat, xərcləri isə 14 758 mln. manat həcmində qeyd olunub. Dövlət Neft Fondunun büdcəsinin xərcləri 5 676 mln. manat təşkil etməklə bu ilə nisbətən 29,9% çox olacaq. DSMF-nin 2009-cu il büdcəsinin gəlirləri və xərcləri 1 775,547 mln. manat həcmində nəzərdə tutulur. Bu isə 2008-ci ilin analoji proqnoz göstəricisi ilə müqayisədə təxminən 17% çoxdur.
Xatırladaq ki, 2009-cu il dövlət büdcəsinin layihəsində neftin baza qiyməti 1 barel üçün 70 ABŞ dolları səviyyəsində nəzərdə tutulub. Bu zaman neft hasilatı ilə məşğul olan ölkələrin proqnozları əsas götürülüb.
Qeyd edək ki, gələn il Azərbaycanda yaşayış minimumunun adambaşına 84 manat, əmək qabiliyyətlilər üçün 92 manat, pensiyaçılar üçün 65 manat, uşaqlar üçün 69 manat, ehtiyac meyarının isə 55 manatdan 60 manata çatdırılması təklif olunur.