Maliyyə

Ana səhifə

Maliyyə

Azərbaycanda bank ssudalarının 40%-ni istehlak kreditləri təşkil edir

12 noyabr 2008 08:40 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən bankların məcmu kredit portfelinin (6 604,7 mln. manat) 4 565,6 mln. manatı uzunmüddətli kreditlərin payına düşür.
Azərbaycan Milli Bankından (AMB) «APA-Economics»ə verilən məlumata görə, bu göstərici ötən ilin müvafiq dövrü ilə müqayisədə 99% çoxdur. Nəticədə, hesabat dövründə kredit qoyuluşlarının strukturunda uzunmüddətli kreditlərin xüsusi çəkisi 8,3 faiz bəndi artaraq 69,1%-ə çatıb.
Eyni zamanda, qısamüddətli kreditlərin həcmi son bir ildə 38,1% artaraq 3 039,1 mln. manat təşkil edib. Qeyd edib ki, Milli Bankın metodologiyasına əsasən, 1 ildən artıq müddəti olan kreditlər uzunmüddətli ssudalara aid edilir.
AMB-dən həmçinin bildirilib ki, yeni verilmiş kreditlərin həcmi oktyabrın 1-nə 7 566,9 mln. manat təşkil edib. Bu da ötən ilin oktyabrın əvvəlinə olan analoji göstərici ilə müqayisədə 67% çoxdur. Yeni verilmiş kreditlərin strukturunda uzunmüddətli kreditlərin xüsusi çəkisi 56,1% (4 247,7 mln. manat), qısamüddətli kreditlərin isə 43,9% (3 319,1 mln. manat) təşkil edib. Nəticədə, yeni verilmiş uzunmüddətli kreditlərin həcmi 2007-ci ilin yanvar-sentyabr aylarına nisbətən 88,2% artıb:

	2008-ci ilin 9 ayı üzrə yeni kreditlər	2007-cı ilin 9 ayı üzrə yeni kreditlər
C Ə M İ	7 566.9	4 513.9
Qısamüddətli:	3 319.1	2 274.6
- 1 ayadək	472.1	380.4
- 1 aydan 3 aya qədər	429.0	319.3
- 3 aydan 6 aya qədər	585.1	304.5
- 6 aydan 9 aya qədər	369.1	191.9
- 9 aydan 1 ilə qədər	1463.9	1 078.5
Uzunmüddətli:	4 247.7	2 257.4
- 1 ildən 3 ilə qədər	3 664.5	1 916.9
- 3 ildən 5 ilə qədər	406.2	212.8
- 5 ildən 10 ilə qədər	147.8	40.3
- 10 ildən yuxarı	29.2	87.4

Göründüyü kimi, Azərbaycanda kreditlərin ən «populyar» müddəti 1 ildən 3 ilə qədərdir və bu təsnifata yeni verilmiş kreditlərin 48,4%-i aiddir. Öz növbəsində bu kreditlərin əsas hissəsi 1-2 il müddətinə ayrılıb.
Qeyd edək ki, bankların ümumi kreditləşməsinin 40%-ə yaxın hissəsini istehlak kreditləri təşkil edir və bu kreditlər də məhz 1-2 il müddətinə verilir. Həmçinin, biznes-kreditlərin də ənənəvi maliyyələşdirmə müddəti 2 ilə qədərdir.