Maliyyə

Ana səhifə

Maliyyə

«Turanbank» dekabrda İslam İnkişaf Korporasiyasından yeni kredit tranşı alacaq

14 noyabr 2008 09:04 (UTC +04:00)

Bakı. Elnur Hüseynquluyev – APA-Economics. Azərbaycanın «Turanbank» Səhmdar Kommersiya Bankı (SKB) 2008-ci ilin dekabr ayının 15-də İslam İnkişaf Korporasiyasından (İİK) cəlb etdiyi 1 mln. dollarlıq kredit xətti üzrə ikinci tranşı alacaq.
Bankın strateji planlama və beynəlxalq əlaqələr şöbəsinin müdiri Rəşad Tanrıverdiyevin «APA-Economics»ə verdiyi məlumata görə, artıq ikinci tranşla bağlı layihə hazırlanıb və yaxın günlərdə İİK-ə göndəriləcək. «Bu tranşın məbləği 670 min dollar təşkil edəcək və bununla da ilin sonunadək bankın İİK-dən cəlb etdiyi vəsaitlərin istifadəsi başa çatdırılacaq. Bankın strateji planına əsasən, növbəti illərdə «Turanbank» İİK tərəfindən ayrılacaq kredit xətlərinin həcmini artırmaq niyyətindədir».
Qeyd edək ki, kredit xətinin birinci tranşı bu ilin iyul ayının 28-də ayrılıb və bu məbləğ 330 min dollar olub. Həmin vəsait şəriət qaydalarına uyğun olaraq səhiyyə, istehsalat və kənd təsərrüfatı sahələrinə ayrılıb. Xatırladaq ki, kredit beynəlxalq qurum tərəfindən ilk 1 ili güzəştli olmaqla 6 il müddətinə vrilib.
Təsisçisi 17 hüquqi və 37 fiziki şəxs olan «Turanbank» SKB 1992-ci ildən fəaliyyət göstərir. Cari ilin oktyabr ayının 1-nə bankın aktivlərinin həcmi 86,1 mln. manat, kredit portfeli 64,7 mln. manat, depozit portfeli 42,3 mln. manat, məcmu kapitalı 17,8 mln. manat, o cümlədən nizamnamə kapitalı 15 mln. manat təşkil edib. Bankın respublika üzrə 11 filialı, 21 mübadilə məntəqəsi, 9 bankomatı və 54 POS-terminalı fəaliyyət göstərir.