Maliyyə

Ana səhifə

Maliyyə

G-20-nin Vaşinqton sammiti nəticəsiz yekunlaşıb

17 noyabr 2008 09:24 (UTC +04:00)

Bakı. Vahab Rzayev – APA-Economics. Noyabrın 15-də Vaşinqtonda keçirilən 20 aparıcı inkişaf və inkişafda olan ölkələrin (G-20) dövlət başçılarının sammiti nəticəsiz yekunlaşıb. «APA-Economics»in məlumatına görə, sammit çərçivəsində dünya maliyyə və iqtisadi böhran və ondan çıxış yolları müzakirə olunsa da, toplantının sonunda birgə tədbirlər planı ilə hər hansı konkret qərar qəbul edilməyib.
«Bloomberg» agentliyi xəbər verir ki, G-20-nin liderləri geriləməyə daxil olan dünya iqtisadiyyatının müdafiə olunması ilə bağlı gələcək addımları və dünya maliyyə sisteminin tənzimlənməsi mexanizminin təkmilləşməsi barədə razılığı gəlib. Söhbət mərkəzi bankların uçot dərəcələrinin aşağı salması, vergi güzəştləri, hesabatların şəffaflığının artırılması, törəmə bazar alətləri, xec-fondları və reytinq agentlikləri üzrə nəzarətin gücləndirilməsindən gedir.
Vurğulamaq lazımdır ki, G-20 sammitində hər hansı konkret razılaşdırılmış tədbir planın qəbul edilməməsi investorları, analitikləri və ümumilikdə müxtəlif bazarların iştirakçılarını məyus edib.
Sammitin yeganə nailiyyəti Beynəlxalq Valyuta Fondunun resurslarının artırılmasına dair iştirakçı dövlətlərin razılığa gəlməsi olub. BVF-nin icraçı direktoru Dominik Stross-Kanın sözlərinə görə, dünya iqtisadi böhranından zərər çəkən ölkələrə yardım göstərilməsi üçün Fonda 100 mlrd. dollar məbləğində əlavə vəsaitlər tələb olunur. Bu məbləğə Yaponiya tərəfindən artıq Fond üçün ayrılan 100 mlrd. dollar daxil edilmir. Hazırda BVF-nin ehtiyatlarının ümumi həcmi 250 mlrd. dollara bərabərdir.
Növbəti sammitin isə 2009-cu ilin aprel-may aylarında keçirilməsi planlaşdırılır.
Qeyd edək ki, dünya maliyyə sistemi G-20 sammitinin daha effektiv olacağını gözləyirdi. Lakin toplantının uğursuz olacağını əvvəlcədən söyləyənlər də az olmayıb. Belə ki, Venesuela prezidenti Ugo Çaves hələ sammitdən öncə bəyan edib ki, uğursuzluq toplantının nisbətən kasıb ölkələrin iştirakı olmadan keçirilməsi ilə bağlıdır: «Kasıb ölkələrin sammitdə iştirak etməməsi və böhrandan çıxış yollarının böhranı yaradanlar tərəfindən müzakirə edilməsi nəticəsində sammit vaxtını boş keçirib». Venesuela prezidenti həmçinin yaxın vaxtlarda kiçik ölkələrin sammitini təşkil etmək niyyətinin olduğunu vurğulayıb.