Maliyyə

Ana səhifə

Maliyyə

Yanvar-oktyabr aylarında Azərbaycanda əsas kapitala investisiya qoyuluşu 38% artıb

18 noyabr 2008 14:58 (UTC +04:00)

Bakı. Nicat Mustafayev – APA-Economics. Bu ilin yanvar-oktyabr aylarında Azərbaycanın iqtisadi və sosial sahələrinin inkişafı üçün bütün maliyyə mənbələrindən əsas kapitala 7 171,3 mln. manat məbləğində və ya əvvəlki ilin müvafiq dövrünün səviyyəsindən 38,4% çox investisiya yönəldilib.
Dövlət Statistika Komitəsindən «APA-Economics»ə verilən məlumata görə, dövlət mülkiyyətinə məxsus müəssisə və təşkilatlar əsas kapitala 4 374,5 mln. manat və ya ümumi investisiyanın 61%-i, qeyri-dövlət müəssisələri 2 796,8 mln. manat və ya 39%-i qədər sərmayə qoyub. Tikinti-quraşdırma işlərində istifadə edilən investisiyanın həcmi əvvəlki ilin müvafiq dövrü ilə müqayisədə 55,6% artaraq 4 544,7 mln. manata çatıb. İstehsal təyinatlı obyektlərin inşasında 5 366,4 mln. manat, qeyri-istehsal təyinatlı obyektlərin tikintisində 1 804,9 mln. manatlıq investisiyadan istifadə edilib.
Hesabat dövründə əsas kapitala yönəldilən vəsaitin 73,9%-i daxili investisiyalar, 26,1%-i isə xarici investisiyalar təşkil edib. Daxili investisiya əvvəlki ilin müvafiq dövrünün səviyyəsini 75,4% üstələyib.
Əsas kapitala yönəldilən daxili investisiyanın 79,8%-i dövlət mülkiyyətinə məxsus müəssisə və təşkilatların, 20,2%-i qeyri-dövlət mülkiyyətinə məxsus müəssisələrin payına düşür.
Cari ildə büdcədən maliyyələşdirilməsi nəzərdə tutulan inşaat işlərini həyata keçirmək üçün dövlət büdcəsində 4 326,3 mln. manat vəsait nəzərdə tutulub. İlin on ayı ərzində bu vəsaitin 2 754,8 mln. manatından və ya 63,7%-dən istifadə edilib. İstifadə edilən investisiyanın ¾ hissəsindən çoxunu tikinti-quraşdırma işləri təşkil edib.