Maliyyə

Ana səhifə

Maliyyə

Azərbaycan paytaxtında Asiya İnkişaf Bankının CAREC Proqramı üzrə VII Nazirlər Konfransı keçirilir

21 noyabr 2008 07:45 (UTC +04:00)

«APA-Economics»in məlumatına görə, toplantıda Azərbaycan, Çin, Qazaxıstan, Qırğızıstan, Monqolustan, Tacikistan, Özbəkistan, Əfqanıstan və digər ölkələrdən təxminən 140-a yaxın nümayəndə iştirak edir.
Tədbiri giriş sözü ilə açan Azərbaycanın iqtisadi inkişaf naziri Şahin Mustafayev qeyd edib ki, Azərbaycan CAREC tərəfindən təqdim edilən təkliflərə böyük maraqla yanaşır və bunların həyata keçirilməsi üçün lazımi tədbirlər görəcək.
Konfransda çıxış edən AİB-in prezidenti Haruhiko Kuroda bildirib ki, CAREC Proqramının yaxşı layihələrə, investisiya yatırımlarına və böyük diqqətə ehtiyacı var. H.Kuroda həmçinin qeyd edib ki, CAREC çərçivəsində üzv ölkələrdə (Azərbaycan da daxil olmaqla) 6 yol layihəsinə artıq 5 mlrd. ABŞ dolları həcmində maliyyə vəsaiti yatırılıb və gələcəkdə bu layihələrin 2020-ci ilə qədər təkmilləşdirilməsi çərçivəsində daha 14 mlrd. dollar həcmində sərmayə qoyuluşu nəzərdə tutulur: «Azərbaycanda bu layihələrdən biri Şərq-Qərb nəqliyyat dəhlizinin yaradılmasıdır ki, bu da Asiya və Avropanın ticarət sahəsində birləşməsində birbaşa rol oynayacaq».
Ümumilikdə, ticarət sahəsində əməkdaşlığa gəldikdə, H.Kuroda Azərbaycanın gömrük sahəsində «vahid pəncərə» sisteminə keçməsini dəstəkləyərək, bu sistemini digər ölkələr tərəfindən qəbul etməsinin vacibliyini vurğulayıb.
H.Kuroda onu da vurğulayıb ki, CAREC Proqramının əhatə etdiyi digər sahə - enerji əməkdaşlığı çərçivəsində müvafiq layihələr və ümumiyyətlə əməkdaşlığın istiqamətlərinin növbəti iclasda müzakirə edilməsi planlaşdırılır. O cümlədən, ölkələrin hidroenergetikanın potensialının öyrənilməsi, iqlim dəyişməsi və su ehtiyatlarının öyrənilməsi kimi məsələlərin müzakirəsi H.Kurodanın fikrincə, çox vacibdir.
Qeyd edək ki, noyabrın 19-dan Bakıda rəsmi səfərdə olan H.Kuroda bundan öncə Ermənistan və Gürcüstanda olub. Ermənistana səfəri çərçivəsində H.Kuroda bu ölkənin prezidenti Serj Sarkisyan və baş nazir Tiqran Sarkisyanla görüşüb. Bundan başqa, H.Kuroda İrəvanda AİB-in rəsmi ofisinin açılış mərasimində iştirak edib. Səfər çərçivəsində H.Kuroda Ermənistanın kənd yollarının inkişafını dəstəkləmək və nəqliyyat sektorunda idarəetmənin yaxşılaşdırılması üçün ölkə hökuməti ilə yeni razılaşma sənədini də imzalayıb.
Gürcüstana səfəri çərçivəsində isə H.Kuroda bu ölkənin baş naziri Qriqol Mqalolişvili və digər rəsmi şəxslərlə görüşüb. Səfər çərçivəsində AİB ilə Gürcüstan hökuməti arasında Fövqəladə Kömək Ssudasının ayrılmasına dair sənəd imzalanıb.
Azərbaycanda isə H.Kuroda artıq dövlət başçısı İlham Əliyevlə görüşüb. Səfər çərçivəsində həmçinin «Elektrik enerjisinin ötürülməsi sisteminin yaxşılaşdırılması Layihəsi», habelə Gəncə dairəvi avtomobil yolunun tikintisi üçün əlavə vəsaitin ayrılmasına dair iki kredit sazişin imzalanması gözlənilir. Səfər boyu AİB-in prezidentini onun məsləhətçisi Hosoda Şuiçi (Hosoda Shuichi) və AİB-in Mərkəzi və Qərbi Asiya şöbəsinin müdiri Xuan Miranda (Juan Miranda) müşayiət edirlər.
Xatırladaq ki, CAREC AİB-in Mərkəzi Asiyada regional əməkdaşlığa dair dəstəklədiyi təşəbbüsdür və onun icrasına 1997-ci ildə başlanılıb. Hazırda bu proqram nəqliyyat, ticarət siyasəti və energetika sahələrini əhatə edir. CAREC Proqramı ilə Beynəlxalq Valyuta Fondu, Dünya Bankı, Avropa Yenidənqurma və İnkişaf Bankı, İslam İnkişaf Bankı və BMT-nin İnkişaf Proqramı sıx əməkdaşlıq edir və bu qurumlar 2006-2008-ci illər ərzində energetika, nəqliyyat və ticarət sahələrində həyata keçirilən investisiya layihələrinin icrasına 2,3 mlrd. dollar həcmində 42 kredit ayırmağı planlaşdırır.