Maliyyə

Ana səhifə

Maliyyə

Azərbaycanda kredit məlumatlarının mübadiləsi sisteminin yaradılmasına dair seminar keçirilib

21 noyabr 2008 10:08 (UTC +04:00)

Bakı. Nicat Mustafayev, Elnur Hüseynquluyev – APA-Economics. Bu gün Bakıda Dünya Bankı Qrupunun (DB) üzvü olan Beynəlxalq Maliyyə Korporasiyası (IFC) Azərbaycan Mikromaliyyə Assosiasiyası ilə birgə kredit məlumatlarının mübadiləsi sisteminin yaradılmasına dair seminar keçirib.
«APA-Economics»in məlumatına görə, seminarın əsas məqsədi özəl kredit bürosunun yaradılması işində iştirakçıların dəstəyini təmin etməkdən ibarətdir. Tədbirdə Azərbaycan hökumətinin nümayəndələri, Azərbaycan Bank Assosiasiyası və dünyanın ən qocaman kredit bürolarından olan SCHUFA-nın ekspertlərindən ibarət 40-a yaxın nümayəndə iştirak edib.
Toplantıda IFC-nin Qlobal Kredit Bürosu Proqramının meneceri Natalya Milenko kredit bürolarının inkişafında beynəlxalq təcrübə, kredit bürolarının maliyyə bazarlarında rolu, həmçinin, bu büroların tənzimləyici rolunu əks etdirən geniş təqdimatla çıxış edib. Seminarda kredit bürolarının üstünlükləri, beynəlxalq tendensiyalar və Azərbaycanda kredit bürosunun yaradılması ilə bağlı ölkəyə xas olan spesifik məsələlər müzakirə olunub.
«Kredit bürolarının yaradılması kiçik sahibkarlıq sektorunun inkişafı üçün vacibdir. Kredit büroları kreditorlar haqqında vaxtlı, etibarlı və obyektiv məlumatlar verməklə maliyyə institutlarına kreditlərin verilməsi vaxtını və xərcləri ən azı 25%, defolt hallarını isə 40-80% azaltmağa və beləliklə kiçik sahibkarların fəaliyyəti üçün maliyyə vəsaiti ayırmağa imkan verir. Bu qənaətləri daha kiçik faiz dərəcələrinə gətirib çıxarmaqla kreditə ehtiyacı olanlar üçün onları daha da əldə edilən və mümkün edir», - deyə N.Milenko vurğulayıb.
Qeyd edək ki, IFC bu seminarı Azərbaycan-Orta Asiya Lizinq üzrə Məsləhət Xidmətləri Layihəsinin vasitəsilə keçirib. Layihə Azərbaycan, Qazaxıstan, Qırğızıstan, Tacikistan və Özbəkistan hökumətləri, o cümlədən bu ölkələrin özəl sektoru ilə kiçik sahibkarlıq fəaliyyəti üçün lizinqin genişləndirilməsi istiqamətində işləyir. Layihə 2001-ci ildən etibarən Azərbaycan və Orta Asiyada lizinq bazarının 234,1 mln. ABŞ dolları səviyyəsinə kimi genişlənməsinə köməklik göstərib. Lizinq üzrə Məsləhət Xidmətləri Layihəsi İsveçrə hökuməti tərəfindən maliyyələşdirilir.